India ram puma lirthei registration hman tawm theih Bharat Series (BS) nei 139 awm tawh

Mizoram sawrkar-a Transport Department chuan India ram puma lirthei registration hman tawm theih ‘Bharat Series’ (BS) number 139 an pechhuak tawh.

Akashvani zawhna chhangin Transport Department hotute chuan Ministry of Road Transport and Highways (MoRTH) chuan August ni 26, 2021 khan thuchhuah siamin BS number hi hemi kum vek, September ni 15, 2021 atanga hman tan tur a nih thu an tarlang a. Mizoram-ah chuan BS number an pekchhuah hmasak ber chu September ni 1, 2022-ah pekchhuah a nih thu sawiin, a diltu nazawng pek an nih loh thu leh Rule 47 of the Central Motor Vehicle Rules, 1989 in a phut ang document nei te chauh Bharat Series number pek theih an nih thu leh chung mite chauh chu pek thin an nih thu an sawi a ni. 

BS number pekchhuah thin te hi a tlangpuiin sawrkar leh Private hnuaia India ram hmun hrang hranga hna avanga kal kual reng te an nih deuh ber thu Transport Department hotute chuan an sawi a. Mizoram-ah pawh diltu tam tak an awm tawh laiin Dan-in a phal anga pekchhuah te chu mi 139 an nih tawh thu an sawi a ni. State khat tana register lirthei te chu dan angin hmundang-a thla 12 aia tam a awm a nih chuan a lirthei awmna State-ah register that leh tur a nih thu thuneitute an sawi a. Hetiang lak atanga an fihlima harsatna awm lova khawi hmunah pawh an lirthei an tlantir theih nan danin a pawmsak chin, BS number nei thei te chu pek thin an nih thu an sawi a ni.