Aizawl-a 1st International Star Expo neih ah ILP nei lo leh thi tawh engemaw zat man an ni

Mizo Zirlai Pawl (MZP) leh Mizoram Merchant Association (MIMA) te chuan Aizawl Lammual-a ‘1st International Star Expo’ neih mekah ILP nei lo leh thi tawh engemaw zat an awm nia sawiin, sawrkar chu enzui tura an duh thu an sawi.

Aizawl Lammual-a ‘1st International Star Expo’ neih mekah hian Mizo Zirlai Pawl (MZP) leh Mizoram Merchant Association (MIMA) tangkawp chuan Zirtawpni kalta, October 10, 2025 khan hnamdang rawn sumdawngte endikin Inner Line Permit (ILP) enfiah a nih thu leh ILP neilo leh thi tawh mi 36 lai man niin thuneitute kutah hlan nghal an ni tih an sawi. MZP leh MIMA te chuan Mizoram chhung ngeiah hnamdang te’n hetiang sumdawnna an rawn kal pui chu tha an tih loh thu leh September ni 30, 2025 (Thawhlehni) khan Joint Meeting lo nei tawhin, 1st International Star Expo-a dan lova hnamdang rawn sumdawngte dawr lo turin mipuite an lo ngen tawh bawk thu an sawi a. He Expo-a hnamdang rawn sumdawng zingah mi 20 chuang mi pakhatin a sponsor thei leh a sponsor-tu ‘Zorun Events’ neitu Laldingngheti Pautu, Lunglei-in a sponsor te ngaihtuah zui miah lova sumdawnna a kalpui chu hriatthiam har an ti hle tih an sawi a, hetiang thil hi kan ramah a thlen nawn tawh loh na turin a rang lama chhui chiang tur leh hetianga Inner line Regulation dan bawhpelh a mi pakhat in heti zat mai hnamdang a sponsor chungchangah action la ngei turin thuneitute an phut thu an sawi a ni.

Hei bakah hian MZP leh MIMA te chuan ‘The Mizoram Gazette Notification Guidelines for the Enforcement of the Inner line Regulation’ ah Mizoram-ah ILP hi mi pakhat in 10 aia tam a sponsor theih loh thu a inziak tih sawiin, chutiang a nih laia mi 20 chuang mi pakhat-in a sponsor leh thei si chu ILP kan kalpui dan mumal loh vang leh thuneitute inthlahdah vang a nih thu sawiin, ILP pekchhuah kawngah pawh fimkhur lehzual turin chuan thuneitute an ngen nghal bawk a. He Expo-a pawn lama ei siamtuten Food Safety & Standards Authority of India (FSSAI) License an neih chu Assam hnuai niin, kum 2020-a expired tawh a nih thu leh an thil siamte hi a tuihnai lo a, hriselna atan a him tawk lo hle nia sawi a awm thu paw sawiin, “Chimral kan nih lohna tura Mizoram a hnamdang lo lutte khuahkhirhna dan khauh tak kan neih hi mimal hlawkna um vang ringawta palzam a nih tawh lohna tur leh Mizoram-ah hetiang sumdawng thei lo hnamdang inthurualpui a sumdawnna kalpui hi awm tawh lo se, he Expo neih mek pawh enzui a, action la nghal turin sawrkar thuneitute kan ngen a ni,” an ti bawk.