Vice President atan CP. Radhakrishnan lakluh a ni

Zonuna Kawlni (LENKAWL) • September 13, 2025 • Comments • Mizoram

India ram Vice President atana thlan thar CP. Radhakrishnan chu nimin khan rinawmna thu tiam tirin Vice President atan lakluh a ni.

Vice President thar lakluhna Inkhawm hi nimin khan Rashtrapati Bhavan-ah neih niin President Droupadi Murmu chuan CP. Radhakrishnan hi rinawmna thu a tiam tir a, he hunah hian Prime Minister Narendra Modi, Vice President hlui Jagdeep Dhankhar, Home Minister Amit Shah, Defence Minister Rajnath Singh bakah ram pum huapa political hruaitute leh mi pawimawh dangten an telpui a. Prime Minister Modi chuan Vice President thar hi lawmpuina hlanin, khawtlang rawngbawlna leh miretheite chawikan nana theihtawp chhuahtu a nih thu a sawi a, Parliament tihlutu a nih ngei a rin thu a sawi bawk.

Tunkar Thawhlehni khan Vice President thlanna hi neih a ni a, NDA Candidate CP. Radhakrishnan hian vote 452 hmuin a khingpui Opposition Candidate leh Supreme Court Judge hlui B. Sudershan Reddy chuan vote 300 a hmu thung a ni. Kum 68-a upa CP. Radhakrishnan hi India ram Vice President 15-na niin Jagdeep Dhankhar a thlak a, BJP Party mi leh sa niin Jharkhand leh Maharashtra-ah te Governor hna a lo chelh tawh bawk a ni.