Bairabi leh Sairang inkar Rel kawng thar ah bungrua phurh tan nghal a ni dawn
Bairabi leh Sairang inkar Rel kawng siam thar chu Vawiin hian Prime Minister Narendra Modi chuan a hawng dawn a, Union Railway Minister Ashwini Vaishnaw chuan Sairang Railway Station chu nimin khan tlawhin, Rel kawng chuan naktuk atangin bungrua (Goods) a rawn phurh tan tur thu a sawi.
Kilomenter 51.38 a thui Bairabi to Sairang Rel kawng siam thar hi Prime Minister Narendra Modi chuan Vawiin hian a rawn hawng dawn a, nimin khan Union Railway Minister shwini Vaishnaw chuan Mizoram rawn thlengin hemi atana inbuatsaihna hrang hrangte a rawn en a. Union Railway Minister hi Lengpui Airport-ah Chief Minister Lalduhoma bakah Education Minister Dr. Vanlalthlana; PWD Minister Vanlalhlana; Lok Sabha MP Richard Vanlalhmangaiha; Rajya Sabha MP K.Vanlalvena leh IPR&PS Secretary Betsy Zothanpari Sailo ten an lo dawngsawng a. Nimin vek khan Sairang-a Rel Station sak thar chu a hmunah tlawhin Bairabi thlengin Rel-ah hian a chuang nghal bawk a ni.
Union Railway Minister Ashwini Vaishnaw hian Rel kawng hawn tur chu Mizoram tan mellung pawimawh tak a nih thu sawiin, Look East Policy tih hlawhtlinna pawimawh tak a nih thu a sawi a. Srinagar atanga Apple tharchhuah tha tak tak Delhi-a thawnchhuah nan Rel an hmang angin he Railway hmang hian Mizoram chuan an thlai leh thei neih tha tak tak, Dragon Fruit leh State dangin an neih ve loh te chu an thawnchhuah theih tawh tur thu a sawi a. Rel kawng chuan naktuk atangin bungrua (Goods) a rawn phur tan tur thu a sawi a ni.
Union Railway Minister chuan he Rel kawng hawn thar hi Mizoram tana hun pawimawh leh chhinchhiahtlak tak, India ram State dang nena intlawhpawh tawnna, inkungkaihna tha zawk siamtu a nih a besei thu a sawi a. He Rel kawng siam nan hian hun leh tha tam tak sen a nih thu sawiin, he Rel kawng a luh theih nan hian leiverh dan chi thar te hmuhchhuah a nih thu a tarlang a. Rail kawng luh theih nana theihtawp a tan latu zawng zawng chu an thawhrimnaah fakawm a tih thu a sawi bawk.
Ruahman lawk ang chuan Prime Minister Narendra Modi hian Vawiin hian lehlanga Aizawl rawn tlawhin Bairabi leh Sairang inkara Rel kawng siam thar hi a hawng dawn a, hemi pual hian Aizawl Lammual-ah hun hman tur niin Sairang to Bairabi Rel kawng a hawn bakah hian Rajdhani Express Aizawl (Sairang) - Delhi (Anand Vihar Terminal) inkar, Aizawl (Sairang) - Guwahati Express leh Aizawl (Sairang) - Kolkata Express chu Prime Minister hian a vailiam nghal dawn a, sawrkar laipui hnuaia hmalakna tur lungphum thenkhat a phum nghal dawn bawk a ni.