Sunday School Inkhawmpui

Serchhip-ah Kohhran hrang hrang ten Sunday School Inkhawmpui an nei mek.
    United Pentecostal Church (UPC) North East India chuan nizan atang khan Bial huap Sunday School Department Inkhawmpui an nei tan a, Ser-chhip Bial Sunday School Inkhawmpui vawi 46-na chu Electric Veng Kohhran Biak In-ah neih niin Thupui atan ‘Thianghlimna – Incheina leh Sex’ tih chu hman a ni a, Serchhip Dinthar Bial Sunday School Inkhawmpui chu Bungtlang Kohhran Biak In-ah neih a ni bawk. Heng Sunday School Inkhawmpui-ah hian nizan khan Inkhawmpui hawnna neiin Vawiin hian Rorel Inkhawm an nei ang.

 

   Mizoram Presbyterian Kohhran pawhin naktuk Pathianni hmang hian Pastor Bial hrang hrangah Naupang Sunday School Inkhawmpui an nei dawn a, Serchhip Pastor Bial Naupang Sunday School Inkhawmpui vawi 90-na chu Serchhip Bethel Kohhran Biak In-ah neiin New Serchhip Pastor Bial Naupang Sunday School Inkhawmpui chu New Serchhip North Kohhran Biak In-ah neih a ni a, Serchhip Vengchung Pastor Bial Naupang Sunday School Inkhawmpui chu Serchhip Bazar Kohhran Biak In-ah neih a ni anga, zanin-ah inkhawmpui hi tanin naktuk zan-ah an tiak ang.

    Salvation Army India Eastern Territory (IET)-a Division hrang hrangte chuan naktuk Pathianni hmang hian Naupang pawl Inkhawmpui, Young Peoples’ Rally an nei dawn a, Central South Division-a Midland Area-I YP Rally chu Thenzawl Bazar Corps-ah neih tur niin Midland Area-I ah hian Serchhip CO Bial bakah Thenzawl CO Bial, Chhingchhip CO Bial leh Chhiahtlang Corps te an awm a, nizan atang khan YP Rally hi neih niin Speaker atan J. Llalrinchhana chu hman a ni a, naktuk Pathianni zan-ah a tiak ang.

    Roman Catholic Kohhran Serchhip Parish Sunday School Inkhawmpui chu nizan atang khan Our Lady of Assumption Church, Serchhip-ah neih tan a ni a, naktuk pathianni zan thleng a awh ang. He Inkhawmpui-ah hian Serchhip Parish-a Kohhran 7 atangin palai an rawn kal a, ‘Catholic rinna nunpui a, puangchhuak rawh’ tih thupui ah hman a ni.