Urban leh Notified Town ah pass pek loh tur

Serchhip District Bawrhsap chuan Serchhip District-a Urban leh Notified Town area-a Village Council te'n House Site Pass chu mimal emaw, pawl hnenah pek tawh loh tur a nih thu a sawi.
Hemi chungchanga September 10, 2025-a thu-chhuah a siam ah Serchhip Bawrhsap chuan Serchhip District-a Urban leh Notified Town area chhungah te Village Council thenkhatin an huam chhungah House Site Pass an lo pe chhuak thin tih hriat a nih thu leh hei hi dan kalh anih thu a tarlang a. “The Mizoram Land Revenue Act 2013-a Section 36 (1), Section 37 & Section 39 leh The Mizoram Land Revenue Rules 2013-a Rule 12 (2), Rule 14 & Rule 16 in a sawi angin, House Site Pass pe thei tu/Competent Authority chu Revenue Officer (sawrkar in approval a pek hnu ah) chauh a ni. The Mizoram Land Revenue Act 2013 Section 16A (2) in a sawi angin - he Act/Dan kalha ram in pek reng reng chu awmze nei lo a ni a, a ram luahtu chu dan lova ram luah, a ram neitu nihna nei lo a ni a, dan anga hnawh chhuah theih a ni,” a ti.

Serchhip Bawrhsap thuchhuah chuan Serchhip District chhunga Land Revenue & Settlement Department in Notified Town-a alo puan tawh khua te chu- Serchhip (Chhiahtlang telin), Baktawng, Bungtlang, Chhingchhip, East Lungdar, Keitum, Khawlailung, Lungpho, North Vanlaiphai leh Thenzawl te an nih thu pawh tar-langin, “Urban leh Notified Town area-a Village Council te'n House Site Pass hi mimal emaw pawl hnenah pek tawh loh tur a ni,” a ti a ni.