PM dawnsawn dan tur thlirho

Tunkar Inrinni-a Sairang Railway Station hawng tura lo kal tur Prime Minister Narendar Modi lo dawnsawn dan tur leh hun hmanpui dan tur inpuahchahna thlirletna chu nimin khan Home Minister K. Sapdanga hovin Aizawl-a Secretariat Conference Hall-ah neih a ni a. Home Minister chuan India ram State dangte leh Mizoram thlunzawmna tur Rel kawng pawimawh tak hawng tura India ram Prime Minister lo kal tur chu tha taka dawnsawn a pawimawh thu leh Mizorama a cham chhunga hun hlawkthlak tak a hman theih nan kalkhawmte chuan an mawhphurhna theuh tha taka hlenchhuak turin a chah bawk. He hunah hian Lengpui Airport, Sairang Railway Station, Thuampui Helipad leh Aizawl Lammual-a venhimna, chawlh hahdamna hmun, inkalpawhna tha leh inbiakpawhna, thutna leh Medical duty ruahman dan en ho a ni a. Prime Minister hmuha phochhuah tur thil chi hrang hrang buatsaihte en ho a ni bawk.