Chhiahtlang dai-ah mi bo ruang hmuh a ni
Nimin lama tarlan tawh angin Henry Lalnunsanga hian Zir-tawpni kalta zan khan Aizawl atangin Scooter (Scooty) hmangin Serchhip a rawn pan a, Inrinni zing khan a Scooter hi ramkal tur ten Chabi la invuahin Chhingchhip lam atanga Chhiahtlang thlen hma KM 3 vela hla, Tuial kawr bulah an hmu a. Scooter an hmuhna atanga meter 300 vela thui kawngpui kam-a Waiting Shed-ah a bag ni ngeia hriat leh Helmet hmuh a ni bawk a. Heng te hi ngaihven lova hun engemaw chen a awm hnuah Thawhlehni khan khawtlang hruaitute nen enfiahin a document atangin a chhungte chu chhuichhuah an ni a. Niminpiah lamah Chhiah-tlang Hmar Veng YMA ten zawngin nimin lam khan khawtlang huapa zawn leh a ni a, chawhma dar 10:45 vel khan a Helmet an hmuhna atanga Chhiahtlang lam meter 100 vel leka thui, kawng-thlang lamah a ruang hi hmuh a ni a, a thihna pawh tlem in a lo rei deuh tawh niin a lang a ni.
Henry Lalnunsanga hi kawngsir-ah thu chawlin a chesual palh chu kawngthlang ah hian a tla nia rin a ni a, a taksa ah hian kutthlakna hnuhma emaw a awm hriat a ni lo bawk a, Serchhip Police te pawh a hmunah hian kal nghalin tihtur tul ang ang an tih hnuah a chhungten a ruang hi nimin vek khan Aizawl lamah an la nghal a ni. Van-duaina tawka boralta Henry Lalnunsanga pa, B. Kapliana hi tunhma deuha Serchhip-a Child Development Project Officer (CDPO) hna chelha lo awm tawh thin a ni.
Nimin-a bo zawnna ah hian mi 200 chuang zet thawkchhuakin Serchhip DC Office atangin SDC Dr. Marilyn Lalruatkimi chuan YMA hnenah hnatlanga thawkchhuakte thingpui inna senso atan cheng sing khat a hlan bawk a ni.