MEDI din chungchang sawipui

Chief Minister Lalduhoma chuan nimin khan a Pisa-ah Entrepreneurship Development Institute of India-a Director General, Dr. Sunil Shukla chu kawmin Mizoram Entreprenuership Development Institute (MEDI) din dan tur a sawipui a. He hunah hian Dr. Sunil Shukla hian Mizoram sawrkarin hmunhma a pek theih chuan CSR Fund an zawn khawm leh Central Scheme atanga Fund awm theite hmangin Entrepreneur & Skill lama hmeichhiate leh zirlai naupangte tan Institute tha tak, Mizoram Entrepreneurship Development Institute (MEDI) an din thei ang tih sawiin, a tir lam kum 5 chhungin Entrepreneurship te, Skill Training te, Start-up te, Incubation leh Mentoring lam te kalpuiin, kum 8 vel chhunga mahnia Campus nei theia din an tum zui dawn tih a sawi bawk.

Chief Minister chuan rawtna an neih te hi a huam a zau in Department kaihhnawih a ngah hle tih sawiin, inrawnkhawmna zau zawk neih a tul dawn tih a sawi a. Coordination Committee din a, chak taka bawhzui an tum tur thu a sawi. EDII hi kum 1983-a din niin Gandhinagar, Gujarat-ah hmunpui neiin, State tam takah Entrepreneurship Development Centre an din tawh a ni.