Kum 2005 atangin Mizoram-ah Dan anga Fa lak (adopted children) 572 an awm tawh

Kum 2005 atanga kumin (2025) August thla thleng khan Mizoram-ah Dan ang taka fa lak (adopted children) 572 awm tawhin Dan anga lak theih tura buaipui mek 11 an awm bawk.

Women & Child Development, Social Welfare, Women and Child Development Department leh Central Adoption Resource Agency (CARA) tangkawp chuan nimin khan Fa lak dan chungchanga hriattur pawimawh inzirtirna, ‘State Level Orientation and Training Programme on Adoption Regulations, 2022’ chu Aizawl-a Hotel Regency-ah an buatsaih a. He huna tarlan a nih danin Mizoram-ah hian Fa lak chungchang buaipuitu District Magistrate (DM), District Child Protection Unit (DCPU) leh Child Welfare Committee (CWC) te chu District tinah pakhat theuh awmin Specialised Adoption Agency (SAA) 13 leh Chief Medical Officer (CMO) 12 an awm a. Hei bakah hian State Adoption Resource Agency (SARA) pakhat a awm bawk a. Kum 2005 atanga kumin August thleng khan Mizoram-ah Dan ang taka fa lak (adopted children) 572 awm tawhin tun dinhmunah fa lak tur nghak mek nu leh pa 36 an awm a. Dan ang taka fa lak theih (Legally Free) 19 awm mekin dan anga lak theih tura buaipui mek 11 an awm bawk a ni.

Nimin-a he hun hman hi Social Welfare Minister Lalrinpuii chuan khuallian nia hawngin, Dan ang taka fa lak chu naupang leh a latu, nu leh pa te tan nakin zelah pawh a him thu a sawi a, hemi chungchang hi midangte hrilhhretu leh zirtirtu a lo tang zel tura he huna kalkhawmte chu ngenin, chutihrual chuan sawrkarin awlsam zawka thil kalpui a nih theih nana hma a lakna- Ease of doing business chu fa lak (adoption) kalphungah pawh kalpui chi a ni em tih lo sawiho a lo ngaihtuah turin a chah bawk a. Adopt ngaia naupang siam thintu lian tak, nupa inthenna leh chhungkaw kehchhia chu tih tlem dan tur ngaihtuah hova naupang tana tuarna rapthlak zia lo inhrilhhria a, Awareness nasa taka lo kalpui thin turin kalkhawmte chu a chah nghal bawk a ni.

Minister chuan adoption mai bakah hian naupang enkawl leh venhimna mamawhte tan inenkawl lailawkna hmun, Foster Care a awm thu sawiin, hei hi naupangte tan Home-a seilian lova chhungkaw enkawlna an dawn theihna hmun a nih thu a sawi a. Mizo mipuite hian intihhmuh nachang kan hriat a tul thu sawiin, tunah pawh hian nu leh pa engemaw zatin harsatna nei lovin an Foster mek thu a sawi a ni.

He training hi Adoption Functionaries te puala buatsaih a nih angin, District tin District Magistrate (DM), Chief Medical Officer (CMO), State Adoption Resource Agency (SARA), District Child Protection Unit (DCPU), Child Welfare Comnittee (CwC), Specialised Adoption Agency (SAA) leh Children's Home aiawh te an tel a ni.