GST rate hniam ruala thilman tihniam turin hriattir

Tun thla ni 22 atanga hman tur, GST rate thar angin sumdawngte chu an bungraw man tihniam ve tura hriattir an ni a, dan zawm lo te chu hrem theih an ni ang.

Hemi chungchanga State Tax Commissioner thuchhuah tarlan danin, India rama GST rate thar hman tur hi tun thla September ni 22 atanga hman tan tur a ni a, bungraw tam zawkah GST rate tihhniam a nih dawn avangin GST Registration nei sumdawngte pawhin GST rate hniam takna bungrua te chu a man an tihniam ve turin a hriattir a, chutianga ti lo te chu GST dan hnuaia Anti-Profiteering Measure hmanga hrem theih an ni thu sawiin, mipuite chu rate hniam tûra ngaih hniam lova zuar/hralh an hriat te chu Phone no. 0389-2336167/841 506 5109/986 258 1640 ah leh Taxation Office hrang hrangah te complain turin a chah a ni.

Hei bakah hian sumdawngin GST Return an file-in an inhralhna (Turnover of Taxable Sales) chu anmahni dawrtute hnena Tax Invoice an pekchhuah mil thlapin an tilang tur a ni tih pawh a tarlang a. An Turnover chu an tax invoice pekchhuah copy hmanga thuneihtute hnena finfiah thei tura vawngtha tura chahin, a zawm lo te chu penalty chawi tir an nih tur thu a sawi bawk.