Party 3 ten bung thar kaina a nih thu an sawi

Mizoram-a Political Party pathum- ZPM, MNF leh BJP Mizoram chuan thuchhuah intawm siamin, Sairang-Bairabi Railway Line Prime Minister Narendra Modi-a’n a rawn hawng tur chu Mizoram chanchina bung thar kaina tur a ni, an ti a, Ramchhung hmun dang nena Rel in a thlunzawm chuan Mizoram thanzelna turah kawng hrang hrangin a pui dawn tih sawiin, mipui tan pawh hna hmuhna tur anih dawn bakah, zin veivah a awlsamin nasa takin a tlawm zawk dawn thu leh sumdawnna kawng pawh zau tak a inhawng dawn thu an sawi a. He hmalakna chhinchhiah tlak tak a taka chantirtu Central sawrkar, State sawrkar leh Rel kawng phah hna thawktu te fakawm an tih thu chu ziahlanin awm ngei se an duh tih an sawi a, “He hun chhinchhiah tlak tak hi Mizo mipuite ta a ni a, mipuite inhawnna, puihna leh phurna hian he hun hi a thlen a ni,” an ti a. State hmasawnna Rel-in a lo thlen tur hi Party pathum te chuan inlungrual takin an lo hmuak a ni tih an thuchhuahah chuan an tarlang bawk.