Smart Class room hawnna Minister hovin neih a ni

Nimin khan School Education Minister Dr. Vanlalthlana hovin Aiawl-a School Education Complex-a Conference Hall-ah Smart Class room hawnna neih a ni.

Smart Class room hawnna ah hian Education Minister Dr. Vanlalthlana chuan HDFC ten CSR Scheme hnuaiah Smart Classroom 36 lai neih belhna tur an pe chu lawmawm a tih thu sawiin, tunah hian hmalakna dangah Smart Classroom 220 atan Tender chhuah a ni a, Smart taka Classroom kalpui a nih theih nan sawrkarin hma a le mek a, khawvel vir ruala kan vir ve theih nan hmanrua hmangin thiamna chi hrang hrang min rawn vur a, chumi um-a kan kal ve loh chuan mi hnungah kan kal anga, an neih kan awt mai ang tih a hlauhawm a, theihtawp kan chhuah a ngai a, chumi atana min puitu tur chu Smart Classroom hi a ni, a ti.

Smart classroom hawnna inkhawmah hian HDFC-a Cluster Head John Varte chuan mipui tana an Bank luanchhuahna hnathawh chi hrang hrang a sawi a, HDFC hian India ram ah Branch 9499 a nei mek a, Veng 4153-ah a in zar pharh tawh a, ATM Booth 21251 a nei mek a ni. Mizoram-ah pawh Branch 11 an nei a, Aizawl-ah Branch 5 an neih bakah Lunglei, Serchhip, Lawngtlai, Siaha, Kolasib leh Champhai-ah te Branch pakhat theuh an nei tih a sawi a, HDFC ten CSR scheme hnuaiah hmasawnna programme an kalpui zingah chuan tuna Smart Classroom hi Education lama hmalakna niin mipui tana an thawh zingah Payment Gateway hrang hrang heng- Tui bill leh electric bill pekna te, zirna In thenkhat te fee pekna ang chi te an buaipui tih a sawi bawk.

Smart classroom hawnna inkhawm hi School Education-a Special Secretary David Lalthantluanga chuan kaihruaiin Smartboard pekna School ten online-in an zawm a, heng School te hian an hman tangkai dan leh hlawkpui dan te an sawi bawk a ni.