Insawichhiat ngawr ngawr CM in dik a ti lo tih a sawi

Chief Minister Lalduhoma chuan insawichhiat ngawr ngawr chu thil dik a ni lem lo tih a sawi.

ZPM party in nimin-a Chhung Inkhawm an neih ah Chief Minister Lalduhoma chuan sawrkar hmasa hunlaia Finance Department hriatpui miah loha Committed Liabilities cheng vbc. 100 chuang pek an ngai tih sawiin, “Hemi hi Finance-ah allocation an dil lo a, Administrative Approval an la lova, Expenditure Sanction pawh an dil lova, Work Order pawh awm lova hnathawh a lo tam lutuk a. Chung ho chuan, ‘hei ka Bill’ tiin an rawn theh lut a, kan sawrkar hnua project thar atana sum kan dah te a ei hek a, chuvang chuan Department reng reng project thar atana sum kan ruahman hi Commited Liability atan hman kan rem ti tawh lo a ni,” a ti.

Hetiang hi thil awmdan a nih thu Chief Minister chuan sawiin, siamthat an tum mek zel tih a sawi a, “Kawng chungchangah pawh la siam zawh loh thehdarh ching te, a tha sa tichhiaa ZPM sawrkar tihmualpho tum te an awm a ni. Kum tam tak chhunga an lo tih theih loh kum 1 leh thla 8 chhunga felfai vek tura min beisei hi chu a dik bik lova. Opposition party-te pawh hian mipui ah insawi ba ngam ve rawh se, ‘Keini chuan heti hian kan ti ang’ tih te hi sawi ve ngam se. Kan beisei chu ‘Kalphung tharin hma kan hruai ang a, party dangin min rawl el se, a tha zawngin kan inel anga, kan ram pawhin hma a sawn phah dawn’ kan lo ti a. Chutiang awm si lova insawichhiat ngawr ngawr hi thil dik a ni lem lo a ni,” a ti.

Chief Minister chuan, “Mi thenkhat ZPM a tui lo inti ten min rawn berawn a, an tui loh chhan kha ka hrechiang si a, dan bawhchhiat ngaia thil min tih tir an tum a, ka thei lo a ni. Khang ho kha chuan min kalsan mahse Pathian in midang tha zawk min pek leh ka ring tho a ni,” tiin an party pawh inenfiah nawn leh turin a chah bawik.