Rel kawng siam tura zangnadawmna la dawng lo nia insawi ten an ram chin hung a tum

Bairabi atanga Sairang thlenga Rel kawng siamna tura ram lak sak, zangnadawmna la dawng lo nia insawi te chuan tun thla, August 2025 chhunga zangnadawmna an dawng lo a nih chuan an ram chin hung an tum thu an sawi.

Rel kawngin a paltlang Sairang-a ram nei mi pali chuan nimin khan Aizawl Press Club-ah thuthar thehdarhtute kawmin an ram lak a nih avanga an pawisa dawn tur chu Indian Railways hotute chuan an pechhuak tawh tih sawiin, thuneitute'n theihtawpin hma lak sak se an duh thu an sawi a. Ram neitu zinga mi T. Remlalnghaka chuan Rel kawngin a ram a sutchhiatah tun thlengin compensation an dawng lo tih sawiin, Survey bakah Spot Cerification neih vek niin kum rei tak an buaipui tawh thu a sawi a. Pawisa dawn tur ang la dawng kim lo mi 10 an awm thu an sawi bawk.

Zangnadawmna la dawng ve lo nia insawi te hian Compensation pek an la nih loh chhan tak hi an hrethiam lo tih sawiin, “DC-ah kan kalin Railways-ah min tir a, Railways lama kan kalin DC lama kal turin min ti leh si. Kan dikna a tawp thlengin kan humhim dawn, August chhunga kan dawng lo a nih chuan kan ram chin kan hung dawn. Thuneitute'n theihtawp min chhuahpui se kan duh,” an ti a. Pawisa hi an pe thei lo a nih chuan pawisa an pek te ramah Rel kawng chu suan mai se an ti bawk.

An sawi danin tun thlenga zangnadawmna la dawng lo hi mi 14 an ni a, zangnadawmna an hmuh theihna tur hian Railways hotute dawrin Delhi leh Guwahati-ah tum thum ve ve an kal tawh thu sawiin, Aizawl DC chuan zangnadawmna an dawn tur ang la dawng lo te hi a kokhawm tawh a, inbiakna te pawh neiin August 19, 2025 hian an ram chu Spot Verification tih that sak tura thutlukna siam a ni a, amaherawh chu dan pangngai anga file a kal leh anih chuan kum 2/3 vel a ngai leh dawn a, Rel a rawn luh tawh dawn bawk si avangin an ngaihthah an hlauh thu sawiin, an ram chin an hung tur thu hi Aizawl DC leh Railways-ah bakah Prime Minister leh Railway Minister-a thlen an tum tih an sawi a ni.

He huna an sawi danin heng mi 14 te zangnadawmna dawn tura chhut hi Rs. 14,56,29,759/- niin Sairang khaw mi te an ni a, Rel kawng hi August 18, 2011-ah Survey neih tan niin kum 2016 khan compensation hi a dawngte chu pek zawh a ni tawh niin an sawi bawk.

Bairabi leh Sairang inkara Rel kawng hi km 51.38-a thui niin November 29, 2014 khan Prime Minister Narendra Modi chuan lungphum a lo phum tawh a, ruahman lawk aia rei hna hi thawh niin tunah hian he Rel kawng hi hawn mai theiha peihfel ni tawhin hawng turin ruahmanna pawh siam chhoh mek a ni bawk.