National Disaster Management Authority (NDMA) atanga Mizoram tlawhtu ten DM&R Minister an kawm

Zonuna Kawlni /

Mizoram-a rawn zin mek National Disaster Management Authority (NDMA) hotute chu nimin khan DM&R Minister Prof. Lalnilawma chuan a Pisa-ah kawmin chak zawka thawhho dan turte an sawiho.

He inkawmna ah hian Mizoram chu khuarel chhiatna thlen nasatna hmun a nih anga District tina khuarel chhiatna hrang hrang leimin, tuilian, lirnghing leh a dangte thlen theihna (Hazard Risk Vulnerability Analysis) enho niin Mizoram chhunga khuarel chhiatna liantham lo thleng tawh hrang hrang Hlimen leimin (1992), Siaha leh Lawngtlai-a ruahpui vanawn avanga chhiatna (1995), Laipui-tlang leimin (2013), tuilian (2017) leh kum 2020-a Champhai-a lirnghingte pawh chipchiar taka enho a ni a. DM&R Department Official-te leh NDMA hotute chuan khuarel chhiatna avanga harsatna thleng thei tihziaawm dan (disaster mitigation) leh chhawm-dawlna (rehabilitation) kawnga chak zawka thawhho dan tur hrang hrangte an sawiho a ni.

National Disaster Management Authority (NDMA) hotute hian nimin vek khan Aizawl leh Lunglei District Disaster Management Authority (DDMA) hotute chu Aizawl-a Royale Lalawi Hotel Conference Hall-ah kawmin an kalphung te an zirchiang a. NDMA atanga lokal Dr. SK Jena chuan an lo kal chhan sawiin, District Disaster Management Authority (DDMA) te hi chhiatrupna a lo thlen changa lo hmachhawn hmasatu an nih avangin Disaster Management an kalpui dan te leh an tun dinhmun te, Disaster Management Plan (DDMP) review leh update dan te, NDMA in DDMA te tichak lehzual tura an chaklohna lai te hriat te hriat an duh thu a sawi a. Heng bakah hian NDMA hnuaia Disaster kaihhnawih Schemes thar hrang hrang te, Standard Operating Procedures (SOPs) leh Guidelines siam thar te inhrilhhriat nan te leh Chhiatrupna lo thleng tawh an lo hmachhawn (Response) dan te, a pumpelh tura in inpuahchahna te, Disaster in harsatna a thlen te tihziaawm tura hma an lak dan te hriaa, an tih dan tha lai te atangin India ram hmun dang te tan zirtur a awm leh hmasawn ngaihna lai an neih te hre tura lo kal an nih thu a sawi bawk a ni.

He inkawmna an neih zawh hnu hian National Disaster Management Authority (NDMA) hotute hian Auizawl-a District Emergency Operating Centre (DEOC) chu tlawhin an dinhmun hrang hrang an enfiah a, ruahman lawk ang chuan Vawiin hian Champhai leh Khawzawl District te tlawh turin Aizawl an chhuahsan leh dawn a ni.

Comments

Post a Comment

I ngaihdan i sawi hian mipui ngaihdan i tarlang a ni!

Popular News (Last 30 Days)

Kawng siam dawn hnai

Zonuna Kawlni /
Image
National Highway-02 siam a nih hnuah he kawngpui in Serchhip Town chhunga a paltlang tawh loh, Chhiahtlang leh Serchhip khawpui chhung kawngpui siamthat hna chu PWD Serchhip Division ten an thawk dawn hnai nia thudawn niin hemi atan hian sum pawh ruahman a ni tawh nia thudawn a ni a. Tun tumah hian khawpui chhung paltlangtu Kikawn leh Sailiamkawn inkar chu Bituminous concrete a siam tum niin kawng siam hi zawhfel a nih hnuah chuan thla ruk (6) chhung Road cutting phalna pekchhuah a ni dawn lo a ni. Tun tuma kawng siam hna thawh turah hian New Serchhip North VC huamchhunga kawng kual nasa lutuk chu paih turin ruahmanna siam a ni bawk nia thudawn a ni.
Kimchang zawkin »

SEDBA hruaitu an thlang

Zonuna Kawlni /
Image
Serchhip District Boxing Association chuan kum 2026-2028 chhunga an hruaitu thlanna neiin President-ah C. Biakchhawna (New Serchhip) Sr. Vice President-ah BC. Liantluanga (Tuikhuah Veng); Vice President-ah R. Vanlalpeka (Vengchung), Secretary-ah David Laldintluanga (New Serchhip) Joint Secretary-ah T. Lalhuthanga (New Serchhip) leh V. Zosangliana (Leisang Veng); Treasurer-ah Prem Lalhmangaiha (Chanmari Veng) leh Fin. Secretary-ah David Lalrinmawia (P&E Veng) te thlan an ni.
Kimchang zawkin »

DIET Serchhip ten an titha

Zonuna Kawlni /
Image
Mizoram Board of School Education (MBSE) chuan nikum (2025) December thlaa Diploma in Elementary Education (D.EI.Ed) Examination a buatsaih result chu niminpiah khan a tichhuak a. District Institute of Education and Training (DIET) Serchhip-a Training mek te pawh an tha thawkhat a ni. DIET Serchhip atang hian 1st Semester-ah zirlai 48 ten Exam beiin mi 39 an pass a, a za zela 81.25 pass ang niin zirlai 9 ten Subject bat an nei a. 3rd Semester-ah zirlai 49 ten exam beiin an vaiin an pass vek thung a ni.
Kimchang zawkin »