MPYCC in Serchhip District-a hmasawnna thleng District dang tana thik tham niin an sawi
Mizoram Pradesh Youth Congress Committee (MPYCC) hruaitute hian nimin khan an President Laltawnliana hova Serchhip rawn tlawhin an Party hruaitute nen an inkawm hnuah Serchhip Press Club-ah thuthar thehdarhtute an kawm a, he hunah hian MPYCC hruaitute chuan, ZPM chuan kum 2023 inthlan dawn khan mipui hmaaah inzuarin nasa takin thu an tiam tih sawiin, “Hei vang hian Mizoram mipui pawhin beiseina sang tak neiin, ‘Min enchhin rawh u,’ an tih ang ngeiin enchhin turin mipuiin sawrkarna kan pe a ni,” an ti a. Mipuiin beiseina nena an thlir mek laiin kum khat leh thla riat vel sawrkarna an hman mekah mipui huapzo ‘Kalphung Thar’ sawrkar beiseitu mipui beisei an pha lo nasain, beiseitute bei an tidawng nasa hle niin a sawi a. “Mipui hmaa an that berna leh danglam bik ni tura an intiamna leh inzawrhna te, ti thei dinhmuna sawrkarna fung an chelh hnuah pawh an tha bik chuang lo a, an danglam bikna hmuh tur a awm lo. ‘Anni pawhin an ti ve tho’ tih chu insawimam nan leh mipui hmaa thiamchan nan an hmang mek a, hei hi a thlangtu mipui zah lohna leh inbumna lian tak a ni,” an ti.
.jpeg)
MPYCC hruaitute chuan kum 1998 khan Congress Party chuan Mizoram-ah District panga (5) a puan belh thu leh Serchhip pawh District Hqrs. ah puan tel niin nasa taka hma pawh a sawn thu an sawi a. “Sawrkar Department hrang hrangte dah thar zel niin, District panga an puan zinga changtlung ber chu Serchhip District hi a ni. Congress Party-in he District chhunga hmasawnna a thlen hi District dang tana thik tham niin hmasawnna a zuang nasa hle bawk a ni,” an ti a. Serchhip District chhunga Congress Party-in hma a lakna thenkhat pawh tarlangin, “Serchhip Bial hian bialtu ah Chief Minister in nei thin hi in vannei kan ti hle a, tunah pawh Bialtu atan Chief Minister in nei hi Bial mipuite kan lawmpui che u,” an ti bawk.
Serchhip Bial leh kuthnathawktute tan Lalduhoma leh ZPM ten nasa takin mipuiah tiam an nei tih MPYCC hruaitute chuan sawiin, “Lau lui Festival te, Thenzawl College pawh a hmuitu tur thlenga hual tawh angin a insawi a. Puantahtute tan pawha hmasawnna nasat dan tur leh an puantaha QR code tah tel a nih tawh dawn thu thlengin uar takin a sawi a ni,” an ti a. “ZPM sawrkar chuan an inzawrhna kuthnathawktute pawisa an la batsak laiin, Chief Minister chuan motor thar lei tum lo leh motor man to-a thu ve lo tura awihawm taka sawi dum dumin mipui hmaah intiam mahse, motor thar an lei mawlh mawlh a, Car manto chhungah a thu leh kuk si hi Congress thalai chuan hriatthiam har a tiin, kuthnathawktute a tiam anga tiam liam satliah lova a thusawi ang ngeia a intiamna ti hlawhtling ngei turin Mizoram Chief Minister hi kan phut a ni,” an ti.
Peace City chungchang pawh MPYCC chuan sawiin, “Lalduhoma’n Peace City a sawi hi Pu Zoramthanga’n Peace Bonus a vuah chawp ang ni lova a hlawhtlinna hi Thenzawl mipui leh Serchhip District mipui chauh chhawr tur mai ni lova rampum mipui tan chhawr nahawm tak an siam theihna tura ti hlawhtling ngei turin kan phut tlat a ni,” an ti a. Congress Party chu India ram State hrang hrang leh Mizoram chhungah nasa takin tunah a thang mek nia sawi bawkin “Mipuiin Congress Party sawrkar nghakhlelin an au leh mek tawh. Mizoram-ah pawh harsatna namenlo, sawrkar in ruahmanna fel fai lo leh mipui hnen thleng phak lo a tam avangin mipuiin enchhin sawrkar laka rilru nghah chu beidawn thlak an ti hle tawh,” tiin mipui beiseina chu nakum a AMC leh kum 2028-a MLA inthlanpui ah a taka an thlentir dawn thu an sawi bawk.