Mizoram-a ‘Health ATM’ hmasa ber Lunglei leh Lungsen tan Health Minister in a hawng

Mizoram-a ‘Health ATM’ hmasa ber chu nimin khan Health Minister Lalrinpuii chuan Civil Hospital Lunglei leh Primary Health Centre (PHC) Lungsen-ah te a hawng.

Lunglei District Administration hmalakna, ‘Healthy Lunglei Initiative’ hnuaia Civil Hospital Lunglei leh Primary Health Centre (PHC) Lungsen-a Health ATM hawnna hi Civil Hospital Lunglei Seminar Hall-ah neih niin Health Minister chuan Lunglei District mai ni lo, Mizoram State pum tan he ni hi ni chhinchhiah tlak a ni tih sawiin, Health ATM chu mipuite'n rang taka mahni hriselna dinhmun — BP, Zunthlum, taksa inphut dan (BMI), Taksaa boruak thianghlim Oxygen awm zat, leh thildang tam tak hriat nan a hman theih dawn tih a sawi a, a khawlte chu IoT (Internet of Things) technology nena thuam a nih avangin result a pekchhuah zung zung bakah, a hmangtute hriselna dinhmun chu lo chhinchhiahin, Digital Health Record a vawng tha nghal zel dawn a, inentir tura damdawi In lian zawk pan nana sum, hun leh tha tam tak sen ngai thin chu engemaw chen a chhawk zangkhai thei dawn tih a sawi a ni.

Health Minister Lalrinpuii chuan Healthy Lunglei District Campaign bakah, Lunglei DC bultuma ngaihsak leh ngaihven ngai zualte huap zo a hriselna kawnga hmalakna — Project LEAP kaltlanga Vohbikte hriselna dinhmun endik leh mi 700 chuang hnena tanpuina hmanrua sem a ni te, Project BLOOM hnuaia Lungsen Aspirational Block huamchhunga nu leh naupang hriselna atana hmalak a ni te chu hlu leh chhuanawm a tih thu a sawi a. Health ATM atana CSR haichhuaktu DC Office te, CSR sum petu ABCI leh BRN te leh khawl mamawh buntu MVS India te chungah lawmthu a sawi a. Health ATM chu Lunglei District hrisel, fei leh chak zawk dinna hmanrua a nih a beisei thu sawiin, mipuite chu tangkai taka hmang turin a chah bawk.

Civil Hospital Lunglei leh PHC Lungsen-a Health ATM bun tur hian Manav Vikas Sanstha (MVS India), Lunglei Deputy Commissioner Office leh ABCI Infrastructures Pvt. Ltd te'n inremna, Memorandum of Understanding (MoU) ziakin, ABCI leh BRN te chuan CSR kaltlangin Health ATM leina leh enkawl zuina tur sum tumin, MVS India chuan a khawl bun, training pek leh a khawl vil zui kawngah mawh an phur a, DC Office chuan a enkawlna leh hman zuina tura ruahmanna hrang hrang an bawhzui ve thung dawn a ni. Health ATM-ah hian test chi hrang hrang 35 vel tih theihin, taksa nihphung tlangpui, Zunthlum, Thisensang, Lung lam, Beng, Mit leh Rilru lam dinhmun te a endik theih dawn a. Hriselna atana ei leh in fimkhur dan tur thurawn te pawh a awm bawk a. Test hrang hrang hi a thlawn veka tih theih niin, darkar chanve tling lova tih zawh vek theih a nih bakah, test result hi mahni Phone-ah a dawn nghal theih bawk a ni.