LADC-a CEM in banna thehlutin a sawrkar a tla

Lai Autonomous District Council (LADC) Sawrkar-a Chief Executive Member (CEM) V. Zirsanga chuan banna a thehluh avangin nimin a LADC sawrkar fiah tum chu fiah ngai lovin sawrkar hi a tla.

Gauhati High Court in LADC-a CEM V. Zirsanga chu thlawptu a ngah tawk em tih fiah tura a tih angin nimin chawhma dar 10:30 khan LADC Chairman T. Zakunga kaihhruaina hnuaiah Lai Autonomous District Council (LADC) Session vawi 11-na neih niin Mizoram Larsap thupek angin CEM V. Zirsanga chuan House-ah thlawptu Member a ngah tawk leh tawk loh fiah tura tih a ni a, Amaherawh chu CEM V. Zirsanga hian LADC Chairman kaltlanga banna a thehluh avangin floor test neih a ngai ta lo a, LADC Chairman chuan House-ah CEM banna hi chhiar-chhuakin V. Zirsanga kaihruai Executive chu a tla tih a puang a ni.

LADC Chairman T. Zakunga chuan LADC chu CCB Rules hmangin rorelna kalpui a lo ni tawh thin tih sawiin, Member nei tam apiangin Sawrkar-na an chang thin tih a sawi a. Sawkar mumal lovin hunrei tak an awm chu pawi a tih thu sawiin, tuna Member-te chuan ram mipuite demna an tawk nasa chu pawi a tih takzet thu a sawi a, Hotute chu Pathian ruat an nih angin rinawm taka awm tawh tur leh Lairam tana theihtawp chhuah theuh turin a sawm a, hemi hnu hian tiamchin awm lovin Session chu a ti tawp zui nghal a ni.

Nimin-a Session neih zawh hnu hian BJP, MNF leh INC tangkawp United Democratic Alliance (UDA) ten Leader-a an thlan M. Kawnpui Bialtu MDC N. Zangura chuan, tun dinhmunah Member 14 an neih mek thu leh LADC a Sawrkarna siam turin hma an lak nghal tur thu a sawi a. LADC ah hian Elected MDC Seat 25 awmin UDA in thlawptu Member 14 an neih bakah ZPM in Member 11 an nei bawk a ni.