Jail 5-ah tang thei tura ruahman aia tam an tang

Mizoram-a lung In hrang hrang zingah Central Jail leh Central Women Jail bakah District Jail pathumah te tang awm thei zat tura ruahman aia tam an tang mek.

    Prisons Department atanga Akashvani Aizawl thudawn danin Mizoram chhunga sawrkar lung In hrang hrangah tang awm thei zat chu mi 1,496 a nih laiin Zirtawpni kalta thlenga report-ah chuan mi 1,928 an tang mek a. Aizawl-a Central Jail leh Central Women Jail bakah Aizawl, Lunglei leh Champhai District Jail-ah te tang awm thei zat tura ruahman aia tam fe an tang a ni. Lung In tang tamna ber Central Jail-ah chuan tang thei zat tura ruahman mi 480 an nih laiin mi 923 an tang mek a, tang thei zat tura ruahman aiin mi 443 in an tam zawk a. Central Women Jail-ah chuan mi 96 leng tura ruahman a nih laiin mi 145 leh an nu ten an hruai naupang 8 an tang mek a, a awm thei zat tur aiin mi 57 in an tam bawk a ni.