Electric Billing System thar-ah Bill hmuh that beisei

August 1 atanga Mizoram pum-a Electric Billing System thar hman a nih avangin Electric Bill hmuh that zawk beisei a nih bakah sawrkarin sum leh pai engemaw zat a hum thei dawn.

Power Minister F. Rodingliana hovin niminpiah khan a Pisa-ah P&E Department hotute chu an hmalakna hrang hrangte thlirhoin an thukhawm a. Electric Billing System thar hman tan a nih tirah electric bill chungchanga harsatna awmte pawh tihfel thuak a nih tawh thu he hunah hian sawilan a ni a. Billing System tharah hian Consumer-ten bill pekna counter pan kher ngai tawh lovin Mobile application (PEDM) hmangin Mizoram khawi hmun atang pawhin mahni awmhmun atangin Eng chhitna bill a pek theih tawh a, hei hian electric hmangtu consumer-te tan nasa takin awlsamna a siam a, Department tan pawh inrelbawlna lamah nasa takin awlsamna a thlen thu sawi a ni.

He System thar avang hian Electric bill pawh hmuh that zawk beisei a nih bakah, Online hmanga bill siam anih tak avang hian consumer-te pawhin electric bill a hun takah an dawng tawh anga, bill hmuh loh leh hmuh tlai a awm tawh lo ang. System thar hman a nih tak avanga Collection efficiency leh Billing efficiency lama hmasawnna hian Mizoram in harsatna a tawh thin, Aggregate Technical & Commercial Loss (AT&C Loss) lamah nasa takin hma a sawn phah dawn a. Paper hmanga electric bill tam tak print ngai thin pumpelh a nih tawh a ni.

He thutkhawmah hian P&E Department Corporatize tura hmalakna peng pakhat atan, Meter Reader Outsource tura hmalak mek chu chak zawka tihhlawhtlin dan tur sawiho niin, Bial hlawm ang zel a then a, Outsourcing kalpui dan tur ruahman a ni a. Tunhnaia Power supply khaihlak thin chungchangte pawh sawiho niin, Fur zualpui a reh chhoh tak avangin RDSS hnuaia hnathawh hrang hrangte ngawrh lehzuala kalpui tan a nih tak thu sawi a ni a. He RDSS hnathawh mek te hi mipui vantlang tana hmasawnna hnathawh kal mek a nih avangin load shedding kalpui fo thin chu mipuite pawhin hrethiam turin an ngen a ni.