Central Service lamah tan lak thar lehzual a tul ti

Department of Personnel & Administrative Reforms (DP&AR) Minister K. Sapdanga chuan sawrkar hnathawka hotu sang zingah leilung fate an awm ta mang lo tih sawiin, Post pawimawh chelh turin Central Service lamah tan lak thar lehzual a tul hle tih a sawi.

Nimin khan Administrative Training Institute (ATI) Hall No. III-ah 2025 Batch Combined Civil Service Officer mi 34-te tana Residential Foundation Training neih tan niin he hun a hmanpuina ah DP&AR Minister K. Sapdanga chuan Civil Service-a tling tharte chu an hna ah duh tawk mai lo a, a Top Post thlenga chuankai tum tur leh chumi ni tura Central Service thlenga kai chho thei tura tan la nasa lehzual turin a chah a. Ttunah hian Mizoram sawrkar hnathawk, a sang lam hna chelh zingah leilung fa, Mizo direct IAS pakhat mah kan awm loh thu leh direct IPS phei chu pakhat chiah neiin kum 30 chhungin IPS pakhat mah kan thar lo tih a sawi a, sawrkar hnathawk sang mawhphurhna pawimawh chelh (Top level decision maker) chu hnamdang hlir an ni tawh tih sawiin, Central service lamah tan la nasa lehzual turin training a telte chu a fuih bawk.

Nimin-a Foundation Training hawnna hunah hian ATI Director Rita Lalnunmawii Pachuau chuan inlawmna thu sawiin, khualzahawm DP&AR-a Commissioner & Secretary K. Lalthawmmawia pawhin thu a sawi a. He hunah hian Lalhmansanga, Joint Director (Admn.), ATI Course Director ni bawk chuan training kalpui dan tur tlangpui a sawifiah nghal bawk a ni.