CM hovin MSPMC hmalakna thlirho a ni

Mizoram State Project Monitoring Committee chu nimin khan Chief Minister Lalduhoma hova thukhawmin an hmalakna hrang hrangte an thlirho.

CM Conference Hall-a MSPMC General Body Meeting vawi 6-na ah hian Chief Minister Lalduhoma chuan MSPMC hnuaia Team hrang hrangte an thawkrim tih a hriat thu sawiin, “In report General Body Meeting-a kan thlirho atang mai pawh hian in inpekzia a lang a ni,” a ti a. “Vawiin ah pawh project 18 in endikte kan enho leh dawn a. Annual Report te pawh kan siam dawn a. In hnathawh hi kan ram tan a tangkai em em a ni,” a ti bawk.

He thutkhawm ah hian kumin April thla atanga August thla thlenga hma an lakna report ngaihthlak niin hemi chhung hian project 18 an tlawh hman a, heng an hmunhma tlawh a an thil hmuhchhuah report leh an rawtnate Committee-ah hian chipchiar taka sawi a ni a. A bawhzui zel dan tur pawh tarlan a ni a. Project kalpui dan tur tha zawk nia an ngaih, rawtna an neih te pawh sawihoin an rawtnate hi a kaihhnawih Department-ah thlen a ni anga. An endik tawh ho Annual Report 2024-25 siam turin an inpuahchah mek bawk.

Heng bakah hian Department hrang hrang 28 hnuaia thawh tur hna (projects) thar 138, endik leh tur chi an lakhawm leh tawh a. Project data lakkhawm tur dang pawh hi a la awm niin an sawi a. Heng project tharthawh hmabak an lakkhawm 138 te hi chu hna an thawh tan phat atanga engkim an enpui theih tawh dawn avangin MSPMC endik hna hi a tangkai lehzual dawn nia ngaih a ni.