NDMA hotu ten Mizoram rawn tlawh mek

National Disaster Management Authority (NDMA) hotute chu Mizoram-a khuarel chhiatna thleng thin leh Mizoram in chhiatna a hmachhawn dan chungchangte belchiang tur leh a tul anga hmalak dan turte rel turin nimin khan Aizawl an rawn thleng a, State Disaster Management Authority leh DM&R Department hotuten Lengpui Airport-ah lo hmuakin an lo dawngsawng a ni. NDMA Officials-te hian nimin vek khan Aizawl leh Lengpui inkar (Pukpui) kawnga lung tlak thinna hmun an tlawh nghal a; Pukpui-ah hian kumin April ni 28 khan lung tla-in Lalrinliana, Falkland-te chhungkaw chuanna Motor delhin amah bakah a nupui leh an fanu ten nunna an lo chan phah tawh a ni.

Ruahman lawk dan chuan NDMA hotute hi Vawiin August 12, 2025 hian District thuneitute leh mi pawimawh dangte nen an thukhawm dawn a, State Emergency Operations Centre, Aizawl tlawhin naktuk, August ni 13, 2025-ah Champhai District leh Khawzawl District-a khuarel chhiatna thlen nasat zualna hmunte tlawh lehin District Emergency Operations Centre-te an tlawh nghal bawk dawn a ni.

State Emergency Operations Centre, Aizawl in kumin May 24 atanga nimin chhun thlenga an chhinchhiah danin kumin hian Mizo-ram hmun hrang hrangah leimin leh lei tawlh 922 zet a awm tawh a, In chhia leh chim 283 awm tawh bawkin In 347 chu leimin avanga rauhsan a nih bakah tuilian avangin In 114 rauhsan a ni tawh bawk a. Leimin avanga kawng ping hmun 446-ah awm tawh bawkin Retaining Wall chim pawh 76 zet a awm tawh bawk a, Thlanmual chim pathum awmin chhiatna thlenga nunna chan mi 6 an awm tawh bawk. Serchhip District-ah leimin hmun 145-ah awmin In chhia 102 leh In rauhsan 185 a awm tawh bawk a ni.