Committee on Public Sector Undertakings in CM kawm

Mizoram Legislative Assembly-a Committee on Public Sector Undertakings chuan nimin khan Chief Minister Lalduhoma chu a Pisa-ah kawmin Mizoram sawrkar hnuaia Public Sector Undertakings pali (4) te chungchanga an thilhmuh te an sawipui a. Chief Minister chuan Assembly Committee hrang hrangten Assembly-ah report an thehluh thin thu leh Committee on PSU ten an report an thehluh hmaa in zirchianna behchhan in thil hmuh an rawn sawipui hmasa chu an bengvar a tih thu a sawi a. “Kalphung tha zawk tur rawtna in rawn neih ngei ka beisei. In recommendation te chu House-ah han thehlut thuai ula, a rang lama tihhlawhtlin kan duhin ka ring,” tiin an rawtna pawm a harsat a rin loh thu a lo hrilh a. An thawh-rimna fakin lawmthu a lo hrilh bawk.

He hunah hian Committee on Public Sector Undertakings Chairman H. Ginzalal chuan ZOHANDCO, MIFCO, MAMCO leh ZIDCO te kalpui zel dan tura Committee in an rawtna neih tlangpui a sawi a. “State dangah te kan zin a, an kal dan kan zir a. Kan thil zirte atanga kan ram tana tha ber tur nia kan hriat report kan siam a, House-a thehluh thuai a ni ang,” a ti bawk.