HISSLAM in Badge dum an bel mek

Higher Secondary School Lecturers Association, Mizoram (HISSLAM) chuan an lungawi lohna hrang hrang lantirin niminpiah atang khan an hnathawhna hmunah Badge dum an bel a, Vawiin thleng hian an bel chhunzawm ang.

HISSLAM chuan thuchhuah an siamah an lungawi lohna hrang hrang tarlangin, kum 1997 hnuah Higher Secondary School Zirtirtu atan direct recruitment neih a nih tawh loh thu leh post ruakte regular-a hnawhkhah vat a tul thu te an tarlang a, HSS-a Contract Lecturer-te chu hun rei tak thawk tawh leh MPSC kaltlanga dan tlawhchhan mumal taka lakte an nih thu tarlangin, Contract-a thawk mekte chu an luh tirha dan hman anga dah nghet turin vawi tam tak sawrkarah an thlen tawh thu leh hmasawnna an hmu thei lo chu HSS zirna ngaihthahnaa an ngaih thu an tarlang a ni.

School Timing, Uniform Policy leh Academic Calendar-te chu Education Professional leh Academician-te'n Department chhungah ruahman tur nia an ngaih thu HISSLAM chuan tarlang bawkin, Public Opinion/Poll hmanga zirna In leh thawktute chungchang chai a ni ta mai chu zirna leh thawktute tan thil tha ber a ni lo ah an ngaih thu an tarlang bawk.