Thla khat kalta chhungin tang tlanchhuak 3 awm tawh

Thla khat kalta chhung khan Aizawl-a Central Jail atangin mi tang 3 an tlanchhuak a, tun thlengin tumah man an la ni lova. Prison Department a thawkte chuan tang tlanchhuah thin chhan hi tang vengtu indaihloh vang a nih ber thu an sawi.

Tun thla July ni 11 (Zirtawpni) zanlai khan Aizawl Central Jail atangin mi pahnih- Lianhmingthanga (36), Thingsulthliah Hospital Area, POCSO case nei leh Malsawmdawnga (28), Farkawn, ND&PS Act thubuai neite chu an tlanchhuak a, Police-te sawi danin tang tlanchhuakte hian an awmna Cell Ceiling tichhiain, an Cell atangin an chhuak a, rizai hmawra rod kâwm an dah chu Jail hungna banga lawn liamna atan an hmang a ni.

Hetihlai hian June ni 15, 2025 zan dar 10:00 vela blanket leh mau hmanga Central Jail bang hungnaa a lawn liam, Lalthawmthanga (28), Zonuam Veng, Aizawl, ND&PS Act thubuai nei pawh tun thlengin man a la ni lo a. Hriat theih chinah kumin chhung hian Central Jail atangin mi 10 an tlanchhuak tawh a, heng zinga mi 7 te hi man leh an ni tawh a ni.

Akashvani Aizawl, Regional News Unit zawhna chhangin Prison Department-a thawkte chuan tang tlanchhuak an awmin duty lai lakah Inquiry lak thin a ni a, thil fel lo awm dan a zirin duty te chu suspend thin an ni a, hetihlai hian tun dinhmun ah tumah suspend an awm rih lo. Jail tang tlanchhuah chhan hi tang vengtu indaihloh vang a nih ber thu sawiin, Mizoram Prison Manual 2017-ah chuan tang vengtu, Jail Guarding duty pakhatin mi tang 6 an veng tur a nih laiin tun dinhmunah chuan mi pakhat in mi 200 bawr vel a ven thin avangin kiltin an veng seng vek thin lo tih an sawi a. Central Jail leh a hungna te chu a tha tawk tawh lo niin an sawi bawk a. Mizoram-a Jail hrang hrangte hi SASCI hnuaiah sak mek an ni a, tun dinhmunah Central Jail chauh thuamthat a la ni rih lo a ni.