MSU in Chin Unau te an thawhpui thin dan sawifiah

Mizo Students’ Union (MSU) General Hqrs. chuan Chin unau pawl hrang hrangte thleibik awm lovin a remchan dan ang angin an thawhpui thin tih an sawi.

Nimin-a thuchhuah an siamah MSU General Hqrs. chuan tunlaia Social Media site hrang hrangh thudiklo hmanga inpuhna awm mek chu pawi an tih thu tarlangin, Myanmar tualchhung buaina avanga kan unau raltlante chu MSU chuan theihtawpin a lo buaipui thin thu leh America ram atangin Foreign Aid (Medical Equipment) te chahlutin theihtawpin chhawmdawl hna an thawh thin thu tarlangin, “Hetiang thil buaipui a nihlai hian Myanmar lam a kan unaute leh zirlai pawl a kan thawhpui Chin Students’ Union (CSU) te phungbawm ah sawm thin an ni. Tunhnaia Social Media a hming rawn lang William-a hi kum 2022 chhung khan Chin zirlai raltlan harsatna tawkte buaipui turin ruat a ni a. A ni chauh lo pawh MSU hian kan Chin unau pawl hrang hrangte thleibik awm lovin a remchan dan ang angin a thawhpui thin a ni,” an ti a. Kum 2024 atanga hruaitu thar kaihhruaina hnuaiah MSU a kal atangin Myanmar unau pawl hrang hrang hi MSU chuan thawhpui a la neih rih loh thu leh tanpui an ngaihna ah erawh chuan Unaute tan theihtawp chhuah turin an inhawn reng thu an sawi a ni.

MSU chuan Zofate hi kan duh vang ni lovin ram pathum India, Myanmar leh Bangladesh-ah te thendarh a awpbeh kan nih thu pawh sawiin, “Ram hran sawrkar awpbehna hnuaiah awm rih mah i la; unau kan nihna hi vawng nung reng turin MSU chuan khawvel ram hrang hranga Zofate a ngen a, ‘Ram in ri nei mahse, hnam in ri a neilo’ tih hi MSU thuvawn a ni reng a ni,” tiin Tunhnaiah Myanmar tualchhung buaina avanga Zohnahthlak unaute inkara inhriatthiam lohna leh ralthuam lekna hial a thleng chu pawi an tih thu leh remna hawi zawng a ke pen zel tura an ngen thu an tarlang bawk.