Mizoram Larsap in Champhai tlawhin Sawrkar Department hotute a kawm

Mizoram Larsap General (Dr) Vijay Kumar Singh chuan nimin khan Champhai tlawhin Sawrkar Department hotute a kawm bakah Assam Rifles COB, Champhai tlawhin Assam Rifles hotute a kawm bawk.

Larsap hi Champhai Helipad-ah District Bawrhsap Mohammad Aaquib leh Addl. SP Victor Zothansanga te'n lo dawngsawngin Champhai DC Conference Hall-ah an District-a sawrkar Department hotute a kawm nghal a, Sawrkar department te'n mipuite hmasawn nana theihtawp an chhuah chu lawmawm a tih thu sawiin, tihtur leh hmabak tam tak a la awm avangin hmasawn zel tura tanlak erawh angai a ni, a ti a. Sawrkar laipui scheme pawimawh hrang hrangte tarlangin, mipuite'n an chhawr tangkai theih nana tanlak a tul thu leh inzirtirna zau zawk neih a tul thu a sawi a. Raltlante tha taka chhinchhiah zel a tul thu pawh sawiin, Resource kan neih tam bik loh avangin nakin zela kan khawtlang leh ramah nghawng tha lo a thlen loh nan kan lo inpuahchah lawk a tul thu a sawi a. Champhai chu ramri kaltlanga drug tawlhrukna lian tak a nih thu leh drug hmansualin khawtlangah nghawng tha lo tak a thlen mek thu sawiin, drug dolet kawngah tanrual a ngai a, a tawlhru thinte manchhuaha an phu tawk hremna pek zel a tul thu a sawi bawk.

Larsap chuan zirna ngaihpawimawh a tul thu leh zirna In te chu zirlaite tana ngainatawm taka siam a tul tih sawiin, India ram-a Exam hautak leh hnalak lian thamahte Mizote kan lan tam theih nana theihtawp chhuah a tul thu a sawi a. Champhai District-ah PM-Kisan Samman Nidhi hamthatna dawngtu an tam chu lawmawm a tih thu leh Farmer Producer Organization (FPO) tam zawk din a tul thu sawiin, Organic thlai tam zawk tharchhuak thei tura hmalak a tul thu a sawi a. Rooftop Solar Scheme, bawlhhlawh sawngbawl, thlai thar sawngbawl bakah hriselna kawnga Scheme pawimawh tak tak - Ayushman Card, Jan Aushadhi leh Health & Welness Centre-te chhawr tangkai thiam a tul thu leh School leh Anganwadi-ah te eitur hrisel chauh sem a tul thu a sawi a. Hmasawnna hnathawh kawngah Sawrkar Department-te chu thawhhona (convergence) ngaipawimawh turin a chah bawk.

He hunah hian Champhai District Bawrhsap Mohammad Aaquib chuan inlawmna thu sawiin, tunhnaiah Myanmar ramri-a inkahna thleng avanga raltlan 4,653 lai Champhai District-ah an luh thu sawiin, raltlan buaipui kawngah lungrual taka theihtawp chhuah a nih dante a tarlang a. SDC Lalchhuanawma Ralte chuan Champhai District Administration, Security dinhmun leh Department hrang hrang hmalaknate a sawifiah bawk.

Hemi hnu hian Larsap chuan Assam Rifles COB, Champhai tlawhin Brig. Pushpendar Sorayan, DIG, HQ 23 Sector Assam Rifles leh hotu dangte a kawm a, an hmalaknate Larsap hi an lo hrilhfiah a. Mizoram Ex-Services Leaque (MESL) hotute'n an kawm bawk.