Nikum-a ASF vanga Vawk thi neitute hnena zangnadawmna pekchhuah tur buaipui mek a ni
Mizoram sawrkar chuan State Disaster Management Authority pawmpuina in African Swine Fever (ASF) chu nikum 2024 chhung atan leh Mizoram State huamchhung atan State Specific Disaster-ah a puang a, hemi bawhzuia State Executive Committee thutlukna angin chhiatna tawkte chhawmdawlna chu Disaster Management Act, 2005, Section a8(1)(a) hnuaia siam, State Disaster Response Fund (SDRF) atangin pek tur a ni a, hemi ang hian nikum-a ASF avanga Vawk thi te chhawmdawlna hi sawrkar chuan pechhuak turin hma a la a, tunah hian Serchhip District-ah hmalakna kalpui mek niin semchhuah thuai beisei a ni.
Serchhip DVO Office atanga LENKAWL in thu a dawn danin nikum (2024) chhung khan ASF avang hian Serchhip District-a khaw 31-ah Vawk 3527 thiin Vawk 7069 suat a ni bawk a, ASF avanga Vawk thi leh suat hi a vaiin 10,596 niin chhungkaw 2127 ten Vawk hri leng hi an tuar a. Sawrkar in kaihhruaina a siam angin ASF avanga Vawk thi neitute hnenah hian State Disaster Response Fund (SDRF) atangin zangnadawmna hi pek theih a ni dawn a, hei hi tunhma lama ASF avanga Vawk suat, sawrkar laipui atanga chhawmdawlna pek thin nen a inang lo a. State Disaster Response Fund (SDRF) kaltlang hian Vawk thi pakhat zelah Rs. 4000/- zel pek tur niin mi pakhat tan Vawk paruk (6) thlengin chhawmdawlna hi dawn theih a ni a, mi pakhat in Vawk paruk aia tam pawh chan mah se paruk chin bak hi pek theih a ni dawn lo a ni.
Nikum May thla khan Serchhip District-ah ASF avanga Vawk thi leh suat hi awm tanin October thla tawp thleng khan chhungkaw 1231 te Vawk 3385 chu ASF vang hian a thi a, heng zinga Vawk 2713 te chu a neitute hi zangnadawmna pek tur hian ruahman niin Rs. 1,08,52,000/- chu pek tura beisei a ni a, amaherawh chu sum hi hmuh kim loh tlem ala awm nia hriat a ni bawk. October thla hnu lamah November thla khan chhungkaw 25 atangin Vawk thi 53 awm lehin December thla ah chhungkaw 5 te Vawk 8 chu a thi leh bawk a, heng te nen hian nikum chhung khan chhungkaw 1261 ten Vawk thi 2774-ah chhawmdawlna hi an dil a, tun tumah hi chuan October thla chin te tan chauh sum hi ruahman a la ni.
Zangnadawmna sum pek tur hi Serchhip District-a District Disaster Management Authority (DDMA)/Deputy Commissioner hnenah a rawn thleng tawh nia thudawn a ni a, tunah hian zangnadawmna dawngtu turte Bank Account enfiah hna chu kalpui mek niin sum pekchhuah hun tur tak erawh hriat theih ala ni lo thung a ni.
Comments
Post a Comment
I ngaihdan i sawi hian mipui ngaihdan i tarlang a ni!