NHIDCL in kawng siam tura hma an lak thu sawi

NHIDCL Executive Director Virendra Kumar Jakhar chuan kawng chhia siam tura hma an lak mek thu sawiin, Fur ruahtui tlak chhung chuan black topping an tih theih dawn rih loh thu a sawi.

Mizoram-a pawl pali- Mizoram Transformation Movement (MTM), Centre for Environment and Social Justice (CESJ), Mizoram First (MF) leh Citizens Alliance for Truth and Social Justice (CATAJ) te chuan nimin khan NHIDCL Executive Director Virendra Kumar Jakhar chu a Office-ah an hmu a, Mizoram-ah NHIDCL in National Highway Km 921 lai siamin an enkawl mek tih sawiin, Sairang leh Kawnpui inkar kawng dinhmun chhiat lutuk avanga motor hial a tluk thin thu leh kawng tha lo avanga Mizoram chhunga khawsak a buai thu an sawi a. Hemi chungchangah hian thuchiang zawk leh hnathawh an tum dan te zawtfiahin, tha tak leh rang takin motor kal harsatna a awm lohna tura hma la turin hriattirna an pe nghal bawk a ni.

NHIDCL Executive Director Virendra Kumar Jakhar chuan kawng a chhiat thu chu an hriat thu lo sawiin, siam tura hma an lak mek thu leh theihtawp chhuah an tum thu a lo hrilh a. Amaherawh chu Fur ruahtui tlak chhung chuan black topping chu an tih theih dawn rih loh thu a lo hrilh a. Mizoram PWD hnen atangin Khamrang leh Kawnpui inkar leh Bilkhawthlir leh Kolasib inkar te hi an enkawl tura la mai tur an nih laiin an la lak chiah loh thu leh lak thuai erawh an tum thu a sawi a. Kawng siam kawnga harsatna an tawh zingah kum rei tak chhung Forest Clearance an neih loh thu leh tunah chuan an neih tawh thu sawiin, thing ding te chu Forest Department in an kih leh senghawi tur a nih avangin tun thlengin hna tak tak an la thawh theih loh thu a sawi bawk.