Mahni Flagship programme, sawrkar kum khatnaa bawhzui awmchhun ZPM chauh a nih thu sawi

Home Minister K. Sapdanga chuan kum khat lek chhungin an Flagship Programme an tihlawhtling nghal tih sawiin, “Mahni Flagship programme, sawrkar kum khatnaa bawhzui awmchhun chu ZPM sawrkar chauh hi a la ni,” a ti a, Sawhthing hralhna la hmu lo ten reilote ah an hmuh tur thu a sawi bawk.

ZPM party chuan nimin khan Aizawl-a an party Office-ah Chhung Inkhawm neiin he hunah hian Home Minister K. Sapdanga chuan, “Mipui sawrkar lakluh kan nih chiah khan Chief Minister Pu Lalduhoma chuan a Minister-ten ni 100 chhunga thawh zawh tur home work min siam,” tiin Pathian zarah ni 100 chhungin an zo thei niin a sawi a. “Chief Minister Home work min pek kha a huphurhawm khawp mai a, sawrkar thar lawmna inchibaina hun pawh awm miah lovin kan phe nghal sung sung a, kalphung thar kan hmu nghal a ni,” a ti a. “Thlai thar leina tur sum budget-ah dah a ni a, sawisel ngar ngartute Sawhthing nen lam kan lei a. A kum khatnaah hmun 672 atangin Sawhthing quintal nuai 3 vel lei a ni a, cheng vbc. 120 velin thingtlanga Sawhthing chingtu kuthnathawktute chhungkaw sing hnih vel choka a thleng. Technical problem avangin Sawhthing hralhtute hnenah sum tlema zawng kan la thun thei lova, reilote ah an thawh hah man an hmu ang,” a ti.

Home Minister chuan thalaiten an thiam zawng leh tui zawnga eizawn bul nna an neihna turin Hand Holding Schem hmangin hma an la mek tih sawiin, “He policy hi mi taima leh mi dikte tan chuan hahdam taka eizawn bultanna a ni a, dinchhuahpui awlsam tak a ni. Sum puk rul tha duh lo leh hmang dik lo te tan erawh chhiatpui hlen theih, tu leh fate thlenga leiba rulhsen loh neih theihna, Policy tihbaiawm tak a ni a, Taima leh dikte pual project a ni. Flagship Programme tihhlawhtlin vat hi atna a nih ngai chuan, kan hotupa ho hian, kuthnathawktute tan kan lo a zel phawt ang,” a ti.

Sawrkar in hma a lakna hrang hrangte pawh Home Minister chuan sawiin, MUHCS-ah Review Committee dinin Health Care Scheme kalphung siamthat ngaite siam thain ngawrh takin an thawk mek tih a sawi a. “Hmasawnna tlo taka thawh a nih theih nan endiktu Party hrang hrang telna Project Monitoring Committee din a ni a, hei hi ZPM tan a ni lo a, ram tan a ni,” tiin Sawrkar hnathawkten an mamawh hunah GP Fund an lakchhuak reng thei tawh thu leh Pension tih fel loh chhekkhawl chu kum khat leh a chanve chhung lekin mi 10623 chinfel sak an nih thu leh a dang 10,000 vel pawh thla khat hnu vela chinfel beisei a nih thu a sawi bawk.