Medical Reimbursement bill theih dan tarlang

Mizoram sawrkar-a Health & Family Welfare Department chuan nimin khan Office Memorandum tichhuakin Review Committee on MUHCS in a rel angin Mizoram Universal Healthcare Scheme hman tan ni, 1 April, 2025 atanga Sawrkar hnathawkte leh an chhungte (dependent family member), Empaneled Hospital ni lova lo inenkawl tawh te Medical Reimbursement Bill chu mahni thawhna Department-ah MR Bill form pangngai hmangin thehluh theih a ni tih an tarlang a. Chung Bill te chu Head of Department/Head of Office ten Chairman, MUHCS Review Committee-ah thehlutin Review Committee hian damlote inenkawlna senso pek dan tur chu a tul angin a ngaihtuah thin ang tih an tarlang bawk. Medical Reimbursement Bill thehluh theih hian April 1, 2025 atanga he thu tihchhuah a nih thleng hi huamin hemi hnu ah erawh chuan Empanelled Hospital ni lova in admit te chu Empaneled Hospital atanga Doctor in a refer-na emaw, Sawrkar hnathawkte leh an chhungte damlo an in-admit atanga darkar 48 chhunga Mizoram State Healthcare Society-a phalna an lak hnuah chauh Medical Reimbursement Bill hi ngaihtuah theih a ni ang tih an tarlang bawk.

Hei bakah hian nimin khan hriattirna dang tichhuakin Mizoram Universal Healthcare Scheme Guidelines 10.3.2-ah cluase thar (i) telhin, mihring nunna atana hlauhawm (life threatening case)/emergency case/tul bik nia Review Committee in a hriat ah chuan Non-Empanelled Hospital remchang apiang pan theih a ni tih a tarlang bawk a. Damdawi In pantute chuan darkar 48 ralhmain an inenkawlna senso bill phalna Mizoram State Healthcare Society-ah an theh lut tur a ni a, a hmuna kal thei lo tan darkar 48 chhungin Google Forms hmangin online-a theh luh theih a nih thu a tarlang bawk a ni. Tarlan tawh angin MUHCS hnuaia inziahluhna hun hi June thla tawp rual khan tawpin, thla thar August thla ah inziahluhna man pangngai aia sangin inziahluh leh theih a ni ang.