Mizoram-a kawng a that theihna turin Joint Civil Society of Mizoram (JCM) din a ni

Mizoram Transformation Movement (MTM) huaihawta tlawmngai pawl pali (4) te inhmukhawm chuan Mizoram in kawng tha a neih theihna tura hma la a thawkho zel turin Joint Civil Society of Mizoram (JCM) an din a, he thawhhona huang-ah hian Mizoram hmasawnna leh thatna duh Civil Society dang te pawh tel turin an sawm bawk.

Centre for Environment and Social Justice (CESJ), Mizoram First (MF), Citizen Alliance for Truth and Social Justice (CATAJ) leh Mizoram Transformation Movement (MTM) te chuan kum 38 zet State nih hnuah pawh Mizoram in kawng tha a la nei thei lo chu manganthlak an tih thu sawiin, Mizoram-in ramin kawng tha a neih theihna tura hma la a, thawkho zel turin Joint Civil Society of Mizoram (JCM) chu July 8, 2025 khan an din thu an sawi a. Joint Civil Society of Mizoram (JCM) hian Mizoram chhunga kawngpui chhe lutuk chungchangah hmalakna chu chhunzawm zel relin hmalakna hmasa atan National Highway 306 leh 06 (Vairengte to Sairang) chu Mizoram nunna hnar, kan mamawh zawng zawng chawkluhna (Life line) a nih avangin Furpui hmain siamthat anih ngei theihna turin a mawhphurtute nawr zui zel an tum thu an sawi a. A bik takin Kawnpui leh Khamrang inkar (Package 7 leh 8) alingment thar siam tura rawtna chungchangah Sawrkar Laipui, Ministry of Road Transport & Highway hnenah Alignment hlui zawk chu a thatna a tam zawka an hriat avangin rawtna thlen an tum tih an sawi a ni.

Hei bakah hian National Highway 44A (Aizawl to Manu, Tripura), Tuidam leh Darlak inkar chhe lutuk leh chetsual hlauhawm tak chu siamthat thuai a nih theihna turin thuneitute hnenah thlen an tum tih an sawi a, he kawng hi tunkar hian JCM hruaituten a hmunah en an tum thu an sawi.

Joint Civil Society of Mizoram (JCM) ah hian Convener-ah Dr Lalbiakmawia Ngente, Co-Convener-ah Lalram Mawia leh Secretary-ah Dr. Vanlalsiama Chhangte te an awm a. Kawngpui hian kan nitin nun leh mitin nun min nghawng avangin Mizoram chhung kawngpui hrang hrang te a theih anga siamthat chhoh zel a nih an duh thu leh khaw tin inkalpawhna kawng te pawh kawng tha tak siam vek turin he lama hma la theitute pawh theihtawp chhuah zel turin an ngen tih an sawi bawk.