MHIP Day vawi 51-na hmun hrang hrangah lawm a ni

Nimin July 6, 2025 (Pathianni) kha ‘Mizo Hmeichhe Insuihkhawm Pawl’ (MHIP) dinchamphaphak, MHIP Day vawi 51-na a ni a, kumin hian MHIP Day hi Pathianni a nih avangin Inrinni khan Branch tam tak chuan a lawmna hun an hmang a ni.
Mizoram-a hmeichhia te insuihkhawmna pawl lian ber MHIP hi July 6, 1974 khan ‘Mizoram Hmeichhe Insuihkhawm Pawl’ tia din a ni a, kum 1998 khan an pawl hming hi ‘Mizo Hmeichhe Insuihkhawm Pawl’ tia thlak niin Aizawl-ah General Hqrs. an nei a, Sub-Hqrs. 10 leh Block 30, Joint 7 neiin Branch 766 an nei mek bawk a, nikum khan an kum 50 tlinna, Golden Jubilee chu ropui takin an lo lawm tawh bawk a ni.

Kumin-a MHIP Day hi Pathianni a nih avangin hmun hrang hrangah mahni remchan anga lawm niin Branch tam ber te chuan Inrinni khan MHIP Day hi an lawm a, MHIP Sub-Hqrs. Serchhip a President Lianthangi chuan Inrinni khan Serchhip Kawnpui VC Hall-a Serchhip Kawnpui Branch MHIP ten MHIP Day an lawmna hun hmanpuiin MHIP chu pawl ropui leh tangkai a nih thu sawiin, chutiang pawl chu a nih zel theihna turin Member te chu Pathian rawngbawlna ah hmanga hlut deuh deuh turin a sawm a. MHIP chuan ‘Mite tanpui’ tih Motto-ah a neih thu pawh sawiin, midangte tanpui tura an thinlung a inpeih a tul thu leh tanpui ngaite tan pawha tan tlak ni tura inbuatsaih turin a chah a. MHIP member te chu an hmalakna ah theihtawp chhuah thar turin a fuih bawk a ni.

Serchhip Kawnpui Branch MHIP ten MHIP Day an lawmna hun hi an President H. Lal-biakzauvi chuan kahruaiin MHIP General Hqrs. President thuchah ngaihthlak a nih bakah Serchhip a One Stop Centre (OSC) atangin hmeichhia te venhimna chungchang inzirtirna hun buatsaih a ni bawk a. Badminton-a hlawhtlinna hrang hrang changtu Lalrempuii hnenah chawimawina hlan a ni bawk. Serchhip Kawnpui Branch MHIP-ah hian member 491 an awm mek a ni.