Chief Minister leh Prime Minister an inkawm

Chief Minister Lalduhoma chuan nimin khan Prime Minister Narendra Modi chu New Delhi-a a chenna In-ah hmuin an inkawm a, Mizoram thil pawimawh hrang hrang an sawidun.

Prime Minister leh Chief Minister te inkawmna a an thusawi zingah Thenzawl Peace City Project chungchang te, Aizawl to Thenzawl kawngpui National Highway-a siam chungchang te, Handholding Policy hmalakna chungchang te a tel a. Tunhnaia Chin Hills, Myanmar-a buaina in Mizoram a nghawng dan chungchangte pawh an sawi bawk. Hei bakah hian Aizawl mipuiten Gas Cylinder ngai tawh lo-a Piped Gas Connection an neih ve theihna tur IGGL in cheng vbc. 9265 man Gas Pipeline Project thawh hna a kalpui mek chungchang pawh Chief Minister hian a sawipui a. Prime Minister chuan pipeline kaltlangna tur Mamit District Bawrhsap chu chak lehzuala hma la tura a duh thu Chief Minister hi a lo hrilh a ni.

Chief Minister hian Prime Minister chu Bairabi - Sairang Rel  kawng thar leh Sairang Railway Station thar hawn sak turin a sawm a. Prime Minister chuan a hmun ngeiah hun remchanga rawn hawn a tum tur thu a lo hrilh a ni.