Kum 2027-ah KMMTTP hman tan a ni dawn tih sawi

Union Minister Sarbananda Sonowal chuan India leh Myanmar inkalpawhna tur Kaladan Multi-Modal Transit Transport Project (KMMTTP) chu kum 2027 atangin hman tan a ni dawn tih a sawi.

Union Minister hian kar hmasa khan Guwahati-a Press Conference-ah he thu hi sawiin hmarchhak bial hmasawn nan sawrkar laipui chuan nasa takin hma a lak thu leh KMMTTP kawngpui, India leh Myanmar inkalpawhna chu kum 2027-ah hman tan a ni dawn tih a sawi a, hei hian hmarchhak bial hrang hrang chu ramchhung hmundangte nen awlsam zawka inpawhna a siam thei dawn tih a sawi a, Aizawl leh Kolkata inkar pawh km 700 laiin a tawi phah dawn tih sawiin, hma-sawnna lian tak a thlen dawn tih a sawi bawk.

Union Minister chuan Myanmar-a Sittwe Lawngchawlhna hmun chu peihfel tawh a nih thu pawh sawiin, a pumpuia KMMTTP Project chu kum 2027-ah an peihfel vek dawn tih a sawi a, Tuipui hmanga inkalpawhna hrang hranga hmasawnna a awm theih nan theihtawp chhuah a nih thu sawiin, hmarchhak Bial chu ramchhunga eizawnna hnar pawimawh tak a ni tih a sawi a, ramdang nena insumdawntawnna kawng pawimawh tak a ni tih a sawi bawk.