Health Minister in ZMC&H tlawhin tunhnaia hmalakna hrang hrang a enfiah

Health Minister Lalrinpuii chuan nimin khan Zoram Medical College & Hospital (ZMC&H), Falkawn tih changtlunna tur atana hmalakna hrang hrangte a hmunah tlawhin a enfiah a, Mizoram Universal Health Care Scheme (MUHCS) kalpui a nih hnuah ZMC&H tih changtlun nan nasa taka hmalak a nih thu a sawi.

Nimin-a ZMC&H a tlawhna ah hian Health Minister Lalrinpuii chuan ZMC&H hnuaia thawktu hrang hrangte chu tlawhkualin an harsatna leh mamawh an sawite a ngaihthlak sak a, sawkar chuan thawktute leh mipuite tan theihtawpa hma a lak zel tur thu sawiin, thawktute inpekna chu lawmawm a tih thu leh hmalakna kal mekte pawh zawhfel thuai a beisei thu a sawi a ni.

Health Minister chuan ZMC&H tih changtlun nana Health Department hmalakna te tarlangin, khum 26 awmna Medicine Ward chu Vawiin a nih loh pawhin a hma thei ang bera hman tan nghal nise a ti a, khum 10 awmna Gynaecology Ward pawh hman tan nghal tur a nih thu sawiin, MUHCS kalpui a nih hnuah Cabin 10 awm thin chu 10 hawn belh a nih tawh thu leh nimin khan Cabin 10 hawngin a dang 10 pawh hawn leh thuai tura ruahman a ni a. Khum 26 awmna Orthopaedic Ward-ah khum 30 dah belh a nih thu sawiin, Nausen pianghlim enkawlna, Neonatal Intensive Care Unit (NICU) pahnih (2) hawn a ni bawk a, a hmaa lo awm tawh sa nen tun dinhmunah NICU hi pariat (8) a awm mek a ni.

Heng bakah hian Pediatric Intensive Care Unit (PICU) tuna awm mek pathum (3) bakah pakhat dang dah belh tura hmalak mek a nih thu sawiin, Integrated Care Unit (ICU) awm tawh sa 13 bakah 13 dang hawn thar a ni dawn tih sawiin, khawl remkhawm hna buaipui mek a ni tih a sawi a. Operation Theatre panga (5) – Gynaecology (2), Cardiology (1), Neurology (1), General (1) hawn thar tura hmalak mek a nih thu leh tun dinhmunah OT hi panga (5) hman theihin a awm mek tih a sawi a. Cardiology Ward thar, khum 6 awmna chu hawn theih tura chak taka hmalak mek a ni tih a sawi a. MUHCS Multitask Worker mi 20 leh Casual Nurse 64 lak thar an ni tawh tih a sawi bawk.