District-ah e-Office kalpui thuai a beiseiawm tih sawi

Mizoram Secretariat-a e-Office kalpui chu District-ah pawh kalpui thuai beisei a ni.

Nimin-a Lawngtlai District tlawhtu Information & Communication Technology leh Cooperation Departmen changtu Secretary Amit Sharma IAS DC Conference Hall-ah Department hotute kawmin e-Office kalpui chungchang hi sawiin, Mizoram Secretariat-ah kalpui a nih tawh thu leh District-ah pawh kalpui thuai a beiseiawm tih a sawi a. Digital Online Platform pawimawhna tarlangin, mipuiten awlsam zawka sawrkar an dawr theihna tur a nih angin theihtawp chhuah mek zel a ni tih a sawi a. Sawrkar Department hrang hrangten tha leh chak zawka hna an thawh theihna turin ICT Department chuan theihtawp a chhuah thin tih a sawi bawk.

He thutkhawm kaihruaitu Lawngtlai DC Cheemala Siva Gopal Reddy IAS chuan Lawng-tlai District dinhmun leh sawrkar hmalakna hrang hrangte a tarlang a, Department hotuten an Department hnathawh leh hmalakna tlangpui bakah harsatna an neih hrang hrangte an lo thlen a. Amit Sharma chuan Department hrang hrangte hnathawh fakawm a tih thu sawiin, harsatna an neih ang angah puih a inhuam thu a sawi bawk.