Badge dum bel tum thulh

Govt. Serchhip College Students’ Union te chuan nimin atanga Badge dum bel-a Class kal an tum chu Lecturer pek belh an nih avangin an thulh.
Thudawn danin Govt. Serchhip College Students’ Union hian an College-a thawktu dah belh ngiata kumin April 16-a lungawi lohna an lantir tumin Academic Session thar tan hma ngeia chinfel sak tura Education Minister a intiamna chu dawhthei taka an nghah hnuah July thla chawhnu lam thleng pawha sawrkarin Zirtirtu dah belhsak loh bakah an College-a Department of Political Science leh Department of Geography-a Casual Faculty post an neihsa pakhat ve ve chu an lâksak niin an sawi a. Hei vang hian nimin atang khan Bagde dum hi bel an tum a ni.

Amaherawh chu sawrkar chuan Asst. Professor-te transfer order tichhuak tharin Govt. Serchhip College-a awm turin Zoology Department-ah Rebecca Lalduhawmi, Asst. Professor (Regular) chu Lunglei Govt. College atangin a rawn dah a, Geography-ah Govt. Aizawl North College atangin Dr. Vanlaltanpuia, Asst. Professor (Contract) leh Mathematics-ah Govt. Champhai College atangin Dr. Samuel Lalmuanawma, Assistant Professor (RUSA) a rawn dah a. Hetianga sawrkar in thawktu a dah belh tak avang hian nimin atanga Badge dum bel chunga Class kal an tum chu an thulh leh ta rih a ni.