Vikshit krishi Sankalp Abhiyan kalpui leh mek

Agriculture leh a kaihnawih a tharchhuah alo pun theihna atan loneitute hnenah thiamna tunlai ber ber hrilh hre tura rampum-a Campaign beihpui thlakna, Vikshit krishi Sankalp Abhiyan (VKSA) chu sawrkar laipui Ministry of Agriculture hnuaiah kalpui mek a ni a, Indian Council of Agriculture Research (ICAR) bultumin Line department zawng zawng nen a tangrual a beihpui hi thlak a ni a. Krishi Vigyan Kendra (KVK) awmna District angin District-ah ruahmanna siam a ni a, District tinah nitin Team pathum insiamin heng Team te hian khaw pathum ah Campaign hi nei tura ruahman a ni a, Campaign hi kalpui mek zel a ni. 

Mizoram sawrkar Directorate of Agriculture, Joint Director B. Ramnunsanga chuan VKSA chu kumin May 29 khan kalpui tan a ni tih a sawi a,tun hnaia Mizoram-a ruahsur nasat avangin he Campaign hi chawlh lailawk niin, a huntiam chin pawh pawhsei a ngaih tur thu a sawi a. Report dawn danin niminpiah thleng khan khaw 217-ah loneitu mipa 10,693 leh hmeichhia 8211, an vaiin 19,174 te hnenah Campaign hi neih a ni tawh a ni.