Serchhip District-a Dan kengkawhtu ten PECA 2019 leh Drugs and Cosmetics Act an zirho

Nimin khan Serchhip-ah ‘Electronics Cigarette/Vape khapna dan’ chungchang zirhona chu Police Officer leh Dan kengkawhtute tan buatsaih a ni.
National Health Mission (NHM) Mizoram hnuaia National Tobbaco Control Programme (NTCP) te buatsaih Prohibition of Electronics Cigarettes Act 2019 (PECA) chungchang zirhona, ‘Half Day Training of PECA for Law Enforcers’ hi Serchhip SP Conference Hall-ah neih a ni a, he hun hi Serchhip SDPO PB. Singh chuan hmanpuiin Dan leh thupek kengkawhtu ten Dan phalloh man leh dapchhuahna kawngah theihtawp an chhuah zel dawn thu sawiin, chu chuan awmzia a neih ngei a beisei thu a sawi a, E-Cigarettes Act chu theihtawp chhuaha kenkawh anih dawn thu pawh sawiin, hemi chungchanga Police Officer te tana Training buatsaih a ni chu lawmawm a tih thu a sawi bakah he huna kalkhawmte chu an training-a mithiam ten thu an sawi chu hre reng tur leh Dan leh thupek kenkawhna kawnga hma an lakna ah hmang tangkai theuh turin a chah bawk a ni.

He Training hi Health & Family Welfare Department DHME-a Addl Director (D) leh National Tobbaco Control Programme (NTCP)-a State Nodal Officer Dr. H. Lianthangpuia chuan kaihruiin NTCP-a State Legal Consultant Vanlalzari chuan Prohibition of Electronics Cigarettes Act, 2019 leh Tobacco kaihhnawih khuahkhirhna Dan hrang hrangte sawifiahin he hun kalkhawm Dan leh thupek kengkawngtu Police Officer te chu a hrilhfiah a. E-Cigaretes tia sawi, Vape leh thildang te chu mihring hriselna atana tha lo a nih thu te sawiin, taksa-ah nghawng a neih dan hrang hrangte chipchiar takin a sawi a, hemi avang hian heng E-Cigaretes lakah hian fimkhur a tul thu leh tunlaiah thalaite zingah hmang tam tak an awm thu te a sawi a. Heng E-Cigaretes khapna Dan, PECA Act 2019 hnuaia Section hrang hrangte pawh sawifiahin, fakmawi, lakluh leh thawnchhuah, siam chhuah leh kawl (stock) a khap dan te a sawi bawk a ni,

Hun hnihna ah Food & Drug Administration (FDA)-a Asst. Director Sarah Laldintluangi chuan Damdawi hman sual (Abuse Drugs) leh Drugs License kalphung leh hemi kaihhnawih a hriat tur pawimawh hrang hrangte a sawi a, Drugs and Cosmetics Act 1949 chungchanga hriat tur pawimawh te, Dan hnuaia Damdawi hralh theih dan leh Dan bawhchhia te man leh hremna hrang hrang te a sawifiah bawk a. Hemi hnu hian sawihona leh zawhna leh chhanna hun hmangin Dr. Lallawmkimi Chhakchhuak, District Nodal Officer (NTCP) pawhin he hun hi a hmanpui a ni.