RD Minister leh VC Association hruaitute inkawm

Rural Development & Administration Department changtu Minister Prof. Lalnilawma leh All Mizoram Village Council Association hruaitute chu nimin khan Minister Pisa-ah inkawmin Mahatma Gandhi National Rural Employment Guarantee Scheme (MGNREGS) buaipui chungchanga Village Council member hnathawh dan te, Mizoram Village Council member-te hlawh ennawn chungchangte leh Village Council inrelbawlna hrang hrang ah Rural Development & Administration hmunhmate tangkai tak a hman a nih ve theihna tur an sawiho a. RD Minister chuan khaw hrang hranga hmasawnna rotling siam a nih theih nana MGNREGS tha taka hlenchhuahna kawnga thawktu pawimawh tak an nih thu sawiin, khawtlang leh ram tana an inpekna ah lawmthu a sawi bawk.

He hunah hian AMVCA President FP. Laikhama leh VC hruaitu dangte an tel a. Ngenna hrang hrang an thlen zingah hian Aizawl-a Village Council Chawlhbuk sak te, Mizoram House hrang hranga VC member-te tana hamthatna siam sak te leh Village Council thar ten 15th Finance Commission hnuaia an huamchhunga hna an thawh ve theihna tura ngenna te a tel a. He hunah hian Village Council mawhphurhna dah pawimawh lehzual a ni theih nana VC Dan ennawn leh siamthat a ni chu lawmawm an tih thu AMVCA hruaitute hian an tarlang a ni.