MLA C. Ngunlianchunga Bail-a chhuah a ni

Lawngtlai West Bialtu MLA C. Ngunlianchunga chu nimin khan Special Judge (Prevention of Corruption) hmaa a inlan hnuah Bail a dilna pawmsak a ni.

Congress MLA C. Ngunlianchunga hi nimin khan Special Judge (Prevention of Corruption) F. Rohlupuia hmaah a inlan a, Court chuan MLA hi Bail a dilna pawmsakin July ni 22 ah inlan leh turin a ti a ni. Thudawn danin Lawngtlai West bialtu MLA C. Ngunlianchunga hi man a ni lo a, Court in man ngaihna a hmuhloh avangin bail hi phalsak niin bail a phalsak chhanah tlanbo hlauhawm a nih loh avang leh hriselna lamah harsatna a neih avangin phalsak a ni a, thla leh July ni 22-ah Court-ah inlan leh tura tih a ni.

MLA C. Ngunlianchunga hi Anti Corruption Bureau (ACB)-in LADC CEM anih laia Lawngtlai by-pass road chungchanga NLCPR atanga sum an hmuh chungchangah pawisa chingpen avangin thubuai a neih thu an sawi a, C. Ngunlianchunga chuan kumin March thlaa Assembly thutkhawm ah Chief Minister Lalduhoma’n a sawichhuah hnuah a hre chiah tih sawiin, Lawngtlai by-pass road siamna atan a CEM laiin kum 2013-ah cheng vbc. 4 chuang a rawn chhuak tih sawiin, kum 2014 January thlaah Minister anih tak avangin CEM atangin a bang a, a hre zui tawh lo tih a sawi a, sum thianghlimlo cheng khat mah a lak loh thu alo sawi tawh a ni.