National Florence Nightingale Award dawngtu lawmpui

Kumin May ni 30-a Nurse chawimawina sang ber, ‘National Florence Nightingale Award’ dawngtu V. Lalhmangaihi, Nursing Officer, Civil Hospital Aizawl hnenah nimin khan Health Minister Lalrinpuii chuan Mizoram sawrkar aiawh chawimawina Citation leh tangkafai a hlan.

He chawimawina hlanna hun Minister Pisa-a neih ah hian Health Minister chuan India ram State hrang hrang mipui tam tak karah Mizo zinga Florence Nightingale Award hial la thei kan awm thin chu lawmawm a tih thu sawiin, a dawngtu V. Lalhmangaihi thawhrimna leh inpekna chu a entawn tlak takzet tih a sawi a. Health Minister Lalrinpuii chuan Award dawngtu V. Lalhmangaihi hnenah Mizoram Sawrkar aiawh chawimawina Citation leh lawmpuina tangkafai Rs.50,000/- a hlan a ni.

He hunah hiaan Health Department-a Secretary H. Lalengmawia IAS leh Dr. SR Ngur-chamliana, Director HME te pawhin lawmpuina thu an sawi a. He Award dawngtu V. Lalhmangaihi pawhin he lawmman dawng thei tura a tul anga buaipuitu Mizoram Nursing Council chungah lawmthu sawiin, Mizoram sawrkarin Cabinet pawmpuina thlapa kumin atanga dan mumal tak siama lawmpuina Citation leh Cash Award Rs. 50000/- a hlan tel chu thinlung taka a lawmzia thu a sawi a ni

National Florence Nightingale Award hi Ministry of Health and Family Welfare, Government of India chuan kum 1973 khan Nurse leh Nursing professional-te’n khawtlang tana an rawngbawlna tha tak takte hriatrengna atan a din a ni. Mizoram chhunga thawk nurse mi 16 in he chawimawina hi an dawng tawh a. Kumin a dawngtu V. Lalhmangaihi hi 17-na niin kumin May 30 khan India President in Award hi a hlan a. Mizo Nurse, State pawna thawk pahnihin an dawng tawh bawk a ni.