Parva khua ah zirna In khar

Parva khuaa Zirtirtu chu sawn a nih avangin an khuaa Zirna In hrang hrangte chu tiamchin awm lova khar a ni. Parva Govt. High School-a thawk V. Lalhmangaihzuala chu a aiawhtu tur dah lovin Lungtian Govt. High School-ah sawn a ni a, hei hi Parva Join Action Committee Meeting chuan hriatthiam harsa an tih thu sawiin, “Kum tam tak hnu a Regular Teacher an neih ve chhun, V. Lalhma-ngaihzuala transfer a ni hi khawtlang hruaituten an pawm lova, a Transfer Order hi sut leh a nih hma chu Parva Joint Action Committee chuan an khua a chhuahsan lohna turin dan an tum a. Zirna In zawng zawng pawh tiamchin awm lovin an khar nghal,” an ti a. Parva Govt. High School chu Parva leh a chhehvel tan zirna In sang an neih chhun a nih avangin an hlutin an tan a pawimawh hle tih an sawi a, amaherawh chu Sawrkar School ni chungin ngaihsak an hlawh ngai lova, kumtin zirtirtu kim lovin Session tawp thlengin School hi an kal thin niin an sawi bawk.