Kumthar-ah Hmunphiah Grading kalpui tawh loh tur

Chief Minister Lalduhoma chuan Hmunphiah hralhna chungchang ah kumin-a Grading kalpui chuan loneitute tan harsatna a thlen avangin kumthar ah chuan grading hi kalpui tawh loh tur a nih thu a sawi.

Nimin a Land Resources, Soil & Water Conservation Department hmalakna thlirletna hun Secretariat Conference Hall-a neih a hmanpuina ah he thu hi sawiin Chief Minister chuan Soil Department allocation of business thenkhat en that a ngai nia ngaih a nih thu leh Coffee chu Soil Department Crop-ah la dahzui zel tur a ni tih a sawi a. Hmunphiah hralhna chungchang ah kumin-a Grading kalpui chuan loneitute tan harsatna a thlen avangin kumthar-ah chuan grading hi kalpui tawh loh tur a nih thu a sawi a. CM Rubber Missions thawh khatnaah cheng nuai 2798.13 dah a ni tih sawiin, kumin a kum khatnaah cheng nuai 1364.14 Expenditure Sanction tawh a nih thu leh sum hi NABARD RIDF XXX atanga hmuh niin Kolasib leh Mamit District-ah kalpui phawt tur a ni tih a sawi a. Kum tharah District dangah tih zui zel tur niin kumtin hectare sang khat zel phun belh tum a nih thu leh kumin ah loneituten an phun hman ngei theih nan a chi supply chu rang taka bawhzui tur a nih thu a sawi a. Chief Minister's Rubber Missions a lo hlawhtlin leh zual theih nan Rubber Clustee Link Roads chu ngaihpawimawh dan dap nise tiin Rubber Rolling Machine set chu Rubber ching mek ten an mamawh em avangin Cluster ten inhmantawm tur subsidy-a pek atan Handholding atangin za (100) tal ngaihtuah ni se a ti bawk.

Chief Minister chuan aan sawrkar in thil thar an ching chhuak nual tih sawiin, “Sawawrkar hnathawkten a taka min lo thlawp kan beisei. Hna hi thawh chak kan duh, kan ram hian hmasawnna hmel hi hmu thuai thuai ila kan duh a, chuvang chuan heng thil thar te hi kan kalpui a ni,” a ti a. “Review Meeting hi thil dik lo zawnga buatsaih thin ka ni lova, in harsatna leh in mamawh te rawn hriatsak che u ka duh vang zawk a ni. Meeting tangkai tak a nih theih nan in ngaihmawh tinreng inthlahrung lovin in sawi dawn nia,” a ti bawk.

Nimin-a thutkhawm ah hian Land Resources, Soil & Water Conservation Department changtu Minister Lalthansanga chuan thu a sawi bakah an Department changtu Secretary Lalsangliana chuan tunhnaia an Department-in hma a lakna leh an hlawhtlinna te tarlangin, a tul angain sawihona neih nghal zel a ni a. An hnathawh langsarte chu Hillside terracing, Water tank, Soil Conservation works bakah Link Roads te, Warehouse sak te a ni a. Cash crop plantation heng - Rubber, Coffee, Hmunphiah leh kuva te an enkawl bawk. Kuvarah process-na tur pawh NEC Fund atangin Chemphai leh Zamuang-ah din mek a ni.