Mizoram Heritage & Tourism Development Committee din dan tur rel a ni

Tourism Minister Lalnghinglova Hmar hovin nimin khan ‘Mizoram Heritage & Tourism Development Committee’ din dan tur sawiho a ni.

Chief Secretary Conference Hall-a he sawihona ah hian Tourism Department, Art & Culture Department, I&PR Department, Land Revenue & Settlement Department leh Planning & Programme Implementation Department atangin Department hotute an tel a, Tourism Minister Lalnghinglova Hmar chuan kut themthiamna hmanga lemziak mi te kutchhuak (art) leh hmanlai pipute khawsak thinna hmun hluite hi kan hnam rohlu a ni tih sawiin, chawisan leh vawnhim a ngaih thu leh khualzin hip theihna hmanraw tangkai a nih thu a sawi a. Hnamdangte hmuh theih tura chawisang turin tunlai khawvel mila ruahmanna tha siam a pawimawh thu a sawi a. Hetiang lama kan hmunhma neih thatte zirchiang tur leh khawvel pum huapa phochhuak thei tur, Mizoram Heritage & Tourism Development Committee din a tul tih a sawi bawk.

He thutkhawmah hian Mizoram chhunga hmanlai puipute sulhnu la awmte tha zawka chhinchhiah leh zinmite hip nana phochhuah dan tur ruahmanna sawiho a ni a. Mizoram Heritage & Tourism Committee din pawimawhna leh mawhphurna an neih dan turte sawi ni bawkin Manaj Saha, United Nations Educational Scientific & Cultural Organization (UNESCO) in art hmasawnna atana a thawhpui UNESCO NGO Partner, Association Internationale des Arts Plastiques/International Association of Art (AIAP/IAA) India Chapter-a President-te nen an inberawn bawk a ni.