Hmun 771-ah leimin awm

Thla hmasa May ni 24 atanga Inrinni thlenga Fur ruahsur-ah khan Mizoram pumah leimin hmun 771-ah a awm niin State Emergency Operation Centre (SEOC) chuan a chhinchhiah a, mi 5-in nunna an chan phah bawk a ni. Chhinchhiahna atanga a lan danin hmun 771-ah lei a min a, In chhia leh chim 272 awmin In rauhsan 452 a awm a, heng zinga In 338 te chu leimin vanga rauhsan a ni a, In 114 chu tuilianin a chim avanga rauhsan a ni thung. Leimin, lei tawlh, chirh tawlh leh lung tla avangin hmun 321-ah kawng a ping a, kawngko lungrem hmun 61-ah a chim a, hmun 11-ah kawngko lung a tla nasa hle bawk. Hei bakah hian thing tlu hmun 8-ah chhinchhiah a ni a, Electric ban tlu 10 leh lei tlahniam hmun 10-ah a awm bawk a. Hmun 3-ah thlanmual a chim a, Sabe-rekakhuangkaih hmun 5-ah a awm bawk a ni.