Health Minister thusawi thu diklo niin sawi

Mizoram Pradesh Congress Committee (MPCC) chuan Health Minister Lalrinpuii’n Aizawl Private Hospital te nen an inrem lawk theih loh chhan sawiah 'Sawrkar hmasa lama bat ral sak a tam thin em vang a ni, tunah chuan nasa taka an inngen hnuin Cashless thei turin inbiakna an kalpui reng a ni' a tih chu thudik a ni lo tih nimin khan thuchhuah siamin an tarlang a. “Sawrkar hian a ba in cashless in damlo te enkawl turin Private Hospital te hi a turlui a, an duh lo phawt zawk a ni. Private Hospital te reuh te te te tan ba ringawta inenkawlin an tlinloh an hlauh vang a ni,” tiin “Hei bakah hian sawrkar in damlo enkawlna tura rate a siam te chu hman mek te aiin 50-70% in a tlawm zawk a, Private Hospital te tan MUHCS chu pawm theih a ni lo zawk a ni,” an ti.

MPCC thuchhuah chuan Congress sawrkar hunlai zawng khan mipui tan Healthcare tha tak sawrkarin a ruahman sak thei tih pawh sawiin, “Private Hospital te pawm theih in leh a chhawrtu mipuite pawhin hun rei tak nghah ngai lova an bill te an hmuhlet theihna turin ruahmanna tha tak a siamsak kha ni,” an ti bawk.